Thai Mungdan hta amyu baw sang shada mahkri shawn rau nga rau pra lu na hpe yaw shada ai let, Chiangmai Mare kaba kaw Bawsang yawng hkum ai Gat dut Poi lamang langai galaw wa ai lam chye lu ai.
Ndai Gat Dut Poi hpe 2025 February 14 ya shani Thai Mungdan Chiangmai Muklum hta amyu bawsang yawng shang lawm ai gat dut poi langai galaw wa ai re.
Ndai Gat dut poi a yaw Shada lam the seng nna, n dai lamang hpe woi awn ai lam hta shang lawm ai Ramma langai n dai zawn tsun ai re.
“anhte Ndai Gatdut poi lamang hpe galaw ai ngu gaw, n dai Thai Mungdan kaw nga ai nbung ai amyu bawsang shada rau jawm nga pra lu na hpe yaw shada let galaw ai lam re, Thai Mungdan Masha ni mung anhte amyu bawsang ni hpe Myen bawsang hku na n yu shapraw na matu, hku hkau kanawn mazum ai hku na galaw ai lam re,” nga tsun ai.
Ndai Gat dut poi lamang hta amyu baw sang yawng shang lawm ai lamang kaba langai hku galaw wa ai rai nna, Htunghking Kahkrang, Mahkawn the shangwi Shapyaw ai lam, Hkrang Pan dut ai lam ni galaw wa ai hpe mu lu ai re.
Thai Mungdan amyu baw sang law law nga wa ai hta, Jinghpaw amyu baw sang ni mung Thai mungdan kaw amyu sha langai hku hkap la sai lam chye lu ai.
Thai Mungdan kaw nga ai Jinghpaw amyu sha ni a lam hte seng nna, Thai Mungdan nga Jinghpaw Laili laika hte Htunghking Hpung Ningbaw Salang Gauri Ja Wa Zau n dai zawn matut tsun dan tawn ai re.
“Ndai Thai Mungdan kaw anhte Kachin ni hpe mung, amyu bawsang langai hku na hkap la sai, Bum masha hku na lekmat jaw hpang nga sai,” nga tsun dan mat ai re.
Ndai lamang hta, lam amyu myu hku na Thai mungdan kaw sa du nga Myen Mung masha marai Tsa lam sa du shang lawm wa ai hpe mu lu ai re.
Ndai lamang hta tinang ai htunghking bu hpawm mawn sumli hte tinang a manu dan ai lam hpe sa madun dan lu ai majaw arawng la ai lam, Jinghpaw ramma shayi sha langai mung n dai zawn tsun da ai re.
