Mashi Kahtawng Kyuhpyi Bum Pawt Mung Shawa Dum Nta Arung Arai Lagu Htaw La Nga
Hpakant Mashi Kahtawng Mung Shawa ni Hprawng Yen kau da ai, dum n ta na Lungseng ni hpe Myen Hpyen ni Mawdaw the lagu htaw la taw nga ai lam ginra amyu shayi langai KNG Shiga dap de tsun dan wa ai re.
Ndai Shata Praw kaw na, Hpakant Mashi Kahtawng Kyuhpyi bum kaw Majan laja lana gap gasat wa ai majaw, Hpakant Mashi Kahtawng Sinna maga Kyuhpyi bum pawt mayan kaw nga ai mung shawa ni yawng hprawng yen ma ai hpang, Dinghku arung arai ni yawng hpe htaw lahka la taw ai lam Ndai zawn tsun dan wa ai re.
“Hpakant Mashi Kahtawng Kyuhpyi bum kaw Majan laja lana gap gasat wa ai majaw, Hpakant Mashi Kahtawng Sinna maga Kyuhpyi bum pawt mayan kaw nga ai mung shawa ni yawng hprawng yen ma ai hpang, Dinghku arung arai ni yawng hpe htaw lahka la kau ya ma sai,”nga tsun ai re.
Dai ni gaw, Mashi Kahtawng Kyuhpyi Bum mayan hta gap gasat hkat ai lam n nga ai hpe chye lu ai re.
February 14 ya jahpawt jau, KIA hte Pawng hpawm dap ni Lawng Hkang Balik dap hpe jahkring sa htim gap gasat wa ai lam nga ai hpe chye lu ai.
Dai hpang, Nbungli du wa na, Pawng hpawm dap maga yawng bai hting nut yen mat ai hpang, Myen Hpyen Nbungli bawm Jam Gat Mare Kahtawlik Nawku jawng wang kaw wa jahkrat bun ai majaw, nawku jawng yawng hten ayai mat ai lam chye lu ai.
Mani Shawng shani Hpakant Lay Pyin Bawm Yam dap lai kaw, Mung Shawa lahkawng bawm kapaw la hkrum ai lam nga ai hpe chye lu ai.
Hpakant hta Ya ten Majan byin ai lam n nga tim, Hpyen masa matut naw shaja hkat taw ai majaw, Majan Chyinghkraw matut naw galu na tai ai lam, Hpyen masa yu maram ai ni tsun tawn ai re.
