Kutkai Pa hta n dai laman Kokang MNDAA dap maga, CCTV hkan shakap ai kaw na, shada laprang mang hkang byin nga ai gaw, dai ni ten du hkra re lam chye lu ai.
Balawng TNLA dap ni Miwa Kyahpyen masha marai 300 htaw shalai wa ai hpe Kokang ni hkap rim kau ya ai majaw, Kokang dap maga na Kutkai pa CCTV shakap ai kaw na, sinat kapaw hkat ai madang du ai lam Kutkai ginra na amyu shayi langai KNG shiga hpe n dai zawn tsun dan wa ai re.
“Kyahpyen Miwa htaw shalai wa ai hpe Balawng ni rim kau ya ai nga tsun ai, anhte gaw n sa mu ai re majaw n chye ai le, CCTV hkan shakap ai kaw na manghkang byin hpang wa ai re gaw chye ai, Kokang Rung shagu na dawng hkawn hkan shayu kau ya, masha hpe gaw, myo shinggan de sa htaw sa kau rai ma ai le,” nga tsun ai re.
Dai zawn mang hkang byin wa ai hpang, Kutkai kaw nga ai Kokang ni yawng hpe Balawng TNLA ni mawdaw hte htaw na Myo shinggan de sa htaw sa kau ai majaw, shada sinat gap kapaw hkat ai lam ni nga nna, hkala ai lam ni mung nga ai hpe chye lu ai.
Ya ten Kutkai pa hpe Balawng TNLA dap ni htim gasat zing madu da ai shara re majaw, shan the hkrai sha Up madu na ngu ai sat lawat hte Jinghku rawt malan hpung ni hpe mara tam taw ai masa re nga, Kutkai na amyu shayi langai tsun ai re.
Ya na zawn, Kutkai Pa hta Balawng the Kokang ni ga law hkat nna, Majan byin wa na hpe ginra masha ni myit tsang taw nga ma ai re.
