Mashi Kahtawng Seng Chyai Kyuhpyi Bum kaw Majan Laja Lana Gap Gasat Hkat Taw Nga
Hpakant Mashi Kahtawng Buga Hpung a Seng Chyai Kyuhpyi bum hta, dai hpawt manap kaw na, Myen Hpyen dap hte KIA Dap lapran majan laja lana gap gasat hkat taw nga ai lam chye lu ai.
Myen Hpyen dap maga hpyen n gun kaba hte htu shadut htim gasat taw nga ai majaw, Majan ding yang matut manoi byin taw nga ai lam Hpakant Ginra na amyu shayi langai KNG shiga dap de n dai zawn tsun dan wa ai re.
“Ngoi nga ai lo, ngoi nga ding yang re, kaji kaba ngoi ai Majan kaba she rai taw nga ai, Myen ni gaw htu nga ding yang re, ndai Nawku Jawng lam hku na mung htu, AIDS kawng lam maga hku na mung htu, laja lana gasat hkat nga ding yang re,” nga tsun dan ai.
Myen Hpyen dap ni gaw, Seng Tawng, Gwi Hka hpe bai htim gasat na masing hte Mashi Kahtawng Kyuhpyi bum hpe shawng htim gasat nna, Seng Tawng Mare dingsa lam, Jam Gap, Namhtun Bum lam ni hku na,Seng Tawng hpe bai gasat zing na masing hte shakut taw nga ai re lam ginra masha ni tsun maram nga ma ai re.
Myen Hpyen dap ni lai wa sai Shata Yuma lam hku na htim gasat yu ai rai tim, masan sa awng dang ai lam n nga ai majaw, ya n dai Seng Tawng Mare dingsa lam hku na bai htu wa ai re lam chye lu ai.
Ya ten Myen Hpyen dap ni gaw, Mashi Kahtawng grup grup yin yin shara la da nna, KIA ni nga ai Sut Chyai maga de htu shadut htim gasat nga ding yang rai nga ai.
Mashi Kahtawng Kyuhpyi bum gaw, n gam, ninghkap dik ai shara re majaw, loi loi hte sha gaw n lu na re nga, Mashi Kahtawng na amyu shayi langai ndai zawn matut tsun dan wa ai re.
“Mashi Kahtawng Nawku Hpung na Kyuhpyi bum gaw ngrem hkaraw sung ai re majaw lung yak ai, shara pa ai ngu na gaw Udang jung tawn ai dai shara kachyi mi sha re, aloi hte sha gaw n lu lung wa na ma ai,” nga tsun ai.
Mashi Kahtawng Kyuhpyi bum mayan Majan laja lana gap gasat hkat taw ai majaw, Hpakant Uru Hka mahkrai hte lam shara n kau hpe mung Myen Hpyen dap pat da ai lam chye lu ai.
Myen Hpyen ni lam hkan shara nga taw ai majaw, lam n tsa mung shawa hkawm ai gadai n nga ai zawn, gat seng ni mung yawng pat da ai lam chye lu ai.
Mashi Kahtawng Buga Seng Chyai Kyuhpyi bum hta gap gasat hkat taw ai n htoi bat lapran mi du nga sai rai nna, dai makau grup yin hkan na Mung Shawa yawng, Nawku Hpung wang ni hta machyu shingbyi taw nga ai lam chye lu ai.
Hpakant ginra kata Majan Nsim n sa byin taw nga ai ten, Seng Tawng Mare dingsa kaw nga ai Company langai na Engine Oil ding sa ru ai majaw, Hpakant ginra ting sama n pyaw manam na, Mung Shawa yawng hkrit kajawng ai lam mung byin lai wa sai re.
