Wunpawng Mungdan Shanglawt Hpyendap (65) ning hpring Rawt malan nhtoi hpawng lamang hpe, February praw (5) ya jahpawt, Laiza kaw galaw ai lam nga ai hpe Chye lu ai.
Hpawng lamang hta Wunpawng Mungdan Shanglawt Hpung, Ginjaw Komiti Tingyang Up, Du Daju Jum Nban La a (65) ning hpring rawt malan mungga madat hkamla ai lam hte magam gun ladaw (50) ning hpring ai magam gun ni hpe Ginjaw Komiti kaw nna, Ja Dakhkama shagrau sha-a ai lam galaw wa ai re.
Ja Dakhkama shagrau sha-a hkamla ai ni gaw Ginjaw Komiti Tingyang Up Malai-1 Du Daju Jum Gunhtang Gam Shawng, Ginjaw Hpaji Dap Ningpawt Ninghpang Hpaji Matsun Du, Sara Kaba Htawngga Yaw Sau hte Dai Lawn Rung kaw na Lat Du UP Jum Udi Awng ni hpe shagrau wa ai re.
Dkb Gam Shawng
Daini na rawt malan nhtoi hta, Wunpawng mungdan shanglawt asuya kata, magam gun ladaw (5) ning hpring, (10) ning hpring, (20) ning hpring, (30) ning hpring, (40) ning hpring, (50) ning hpring shagrau sha-a hkam ai magam gun ni yawng marai (1414) rai nna, ndai magam gun ni yawng a matu hte Ginjaw komiti a shawnglam magam bungli ni a matu, rawt malan magam hta shakut shaja nga ai magam gun ni yawng a matu laksan akyuhpyi ai lam mung galaw ai re.
