Hpakant Mashi Kahtawng Kyuhpyi Bum hte Namhtun mare maga ni de dai hpawt manap kaw na majan laja lana gap gasat hkat wa ai hpang, Myen Hpyen Nbungli bawm shani ting wa jahkrat bun taw nga ai lam, Hpakant ginra masha ni kaw na chye lu ai.
Dai hpawt manap hkying 10 ram kaw na dai na maga hkying 2 ram ten du hkra Y-12 Nbungli 10 lang jan pyen gayin na bawm grai lang jahkrat bun kau da sai lam, Hpakant ginra na mung shawa langai KNG shiga de n dai zawn tsun dan wa ai re.
“Dai hpawt jau kaw na, Mashi Kahtawng Kyuhpyi bum maga hte Seng Tawng Mare dingsa sa lam na Nam Htun Mare maga de gap hkat taw nga ai kaw, hkying 8 ram hta gaw, ထုံးဘို mare maga de Jet Nbungli bawm wa jahkrat kau da ma ai, ngut na shani ka-ang hkying 12 ram kaw na gaw, Y-12 nbungli the shani ting bawm bai jahkrat bun taw ai,” nga tsun dan ai re.
Myen Hpyen dap ni January 30 ya shani kaw na, Seng Tawng mare dingsa lam maga de hpyen n-gun kaba hte htim gasat wa ai hpe, KIA hte pawng hpawm dap ni hkap shingla gasat ai majaw, Myen Hpyen dap maga bai gan htingnut na Sut Bum maga de hpyen man bai shamu mat ai re.
Ndai laman Myen Hpyen dap hte KIA Pawng hpawm dap ni majan laja lana bai gap gasat nga ai majaw, Mung Shawa Si hkala lam ni shani shagu byin taw nga ai re.
Dai ni shani ka-ang ten hta mung Myen HPyen laknak kaba a majaw, Hpakant King KTV shara kaw Bawm hkrat kapaw wa ai rai tim, masha si hkala lam nga n nga hpe gaw, a tsawm tup hkrak n chye lu ai re.
Wunpawng Mungdan Shanglawt Hpyendap KIA Dapba 9 kaw na woi awn ai hte, Nawnglut ginra de mung hpyen man hpaw htim gasat ai lam ni galaw taw nga ai re.
Ya ten KIA maga Hpyen man law law hpaw gasat nga ai majaw, Myen Hpyen dap ni dai hpe ahkaw ahkang la nna, htim gasat taw nga ai re lam mung masa yu maram ai ni tsun ai re.