KIA Htim Gasat Zing Kau Ai Lisu Pyithutsit ni Mungna Hpyenyen Dabang makau de htawt sit wa nna, Shagyit Nnan bai wa jahkrat
Waimaw Mungna hte Washawng lapran na Lisu Pyithutsit ni hpe Wunpawng Mungdan Shanglawt Hpyen dap hte pawng hpawm dap ni sa gap hpya kau ai hpang, Mai Na Hpyen yen dabang makau de ni kahtep wa nna, Shagyit bai wa dung taw nga ai lam, Langu Sun bungli galaw masha ni kaw na chye lu ai.
Mani hpawt jau, Tinggi Hka mahkrai makau hte Solar Pyar Site makau na Lisu Pyithutsit ni hpe KIA sa htim gasat kau ai hpang, Mai Na Hpyen Yen Dabang hte ni ai Langu sun maga de bai htawt sit nna, Shagyit bai wa dung taw ai nga, Langu sun bungli galaw masha langai KNG Shiga de n dai zawn tsun dan wa ai re.
“Mani sa gap hpya kau ai Solar pyar Site the Tinggi Hka mahkrai makau na Lisu Pyithutsit ni, Maina Hpyen yen Camp lai na shawng du ai langu sun shawng na lam kaba kaw bai dung taw sai, Madung gaw, langu mawdaw hte Shanglawt ginra de pru hkawm sa ai mawdaw ni kaw na gumhpraw hta sha taw ai majaw, kalang ta gaw n dawm ai ga rai nga ai,” nga tsun sang lang dan ai re.
Mung Na hte Wa Shawng lapran n lung mawdaw lam n tsa dung ai Pyithutsit hpyen dap ni hpe KIA woi awn ai pawng hpawm dap ni mani hpawt jau kawn htim gasat wa ai rai nga ai.
Dai zawn htim gasat ai hta, lai wa sai ten, KIA tat sum kau ai shara lahkawng hte Pyithutsit dap shara lahkawng yawng 4 hpe gasat zing la lu wa ai re lam chye lu ai.
Ya KIA htim gasat zing ai lam gaw, Waimaw majan byin wa ai ten kaw na, Waimaw Washawng Gatdara lam kaba n mai lai mat ai majaw, Mung Na Washawng nlung lam hpe bai jai lang wa ai mung rai nga ai.
Dai lam kaba gaw, ya ten, Langu htaw ai mawdaw ni ding yang lai nga nna, KIO Uphkang ginra ni de lai sa ai mawdaw lam kaba mung rai nga ai.
KIA dap maga Lisu Pyithutsit shara ni hpe htim gasat zing kau ai hpang, hpyen masa matut shaja hkat taw nga nna, Myen Hpyen dap maga laknak kaba gap shadam bun ai lam ni galaw taw nga ai lam chye lu ai re.
