KBC Laika Hpaji Sasana Saranum lahkawng, roi rip Zingri Sat hkrum ai, dai ni 11 ning ladu hkrum ai ten du hkra rai tim, tengman rap ra ai hpe n lu la ai re.
Bum ga, nam mare kahtawng ni de asuya kaw na jawng Sara n lu jahkrat ya ai ginra ni hta, KBC kaw na litla ai Laika hpaji sasana hku na sa da ai, Saranum Maran Lu Ra the Saranum Tangbau Hkawn Nan Tsin yan hpe 2015 ning January 19 ya shana yuptung hpawa ten, dai kaw gan du nga ai Gumshem Myen Hpyen စစ်ကြောင်း hpung ni kaw na roi rip zingri sat kau ai re.
Gumshem Myen hpyen စစ်ကြောင်း ni roi rip zingri sat kau ai hpe, KBC hku hte Mungmyit Sinli Tara kasa hpung ni pawng let, tengman lam tam komiti hpaw nna, shakut wa yu ai rai tim, tengman lam hpe n lu wa ai re.
Saranum yan hpe myitdum ai nawku dawjau hpawng lamang hpe 2021 ning Jaw Bum kaw 6 Ning hpring lamang galaw ai hpang, Myen Hpyen dap daru magam zing kau ai majaw, ladu hkrum kyuhpyi hpawng galaw ai lam n mu lu mat ai re.
Laika hpaji sasana saranum yan roi rip zingri sat hkrum wa ai hpe, Wunpawng amyu sha ni yawng maroi nni masin n si hkrap ngu hkrap ngoi yawn madai lai wa sai re.