Gwi Htu Pyithutsit Ningbaw Miwa Naw Li hpe Myen hpyen dap rim da ai kaw na bai dat ya nna, Gwi Htu ginra kaw Ningbaw bai wa galaw taw sai lam ginra masha ni kaw na chye lu ai.
Salang Naw Li wa gaw, shi n pu na Gam Awng wa hpe gap sat kau ai hpang, Bankok de tsi tsi sa ai kaw na bai n htang wa ai hpang, Mandalay Nbungli pa kaw rim hkrum wa ai rai nga ai.
Masha sat amu mang hkang hte rim hkrum wa ai rai tim, Shata lam sha htawng rawng nna, bai lawt pru wa ai mung rai nga ai.
“Dai Zawn အာဏာ kashun Hkat, Masha Sat Hkat rai na Rim na bai dat dat ai Myen Hpyen Dap a masha hpe anhte mung shawa ni kaning di kam sha na, mare buga galu kaba hkra galaw na ngu gaw gara hku mung n mai byin ai,” nga tsun ai re.
Salang Naw Li wa htawng na lawt pru wa ai hpang, Gwi Htu ginra hpe bai wa uphkang taw nga sai rai nna, Lai sai ten, Ningbaw kaba La Sang Awng Wa na masha ni hpe rim ahkyak la ai lam ni galaw taw nga ai hpe chye lu ai.
Gwi Htu Ginra Ningshawng mare na Dujum Bala Htoi Yan hpe January 11 ya shani Kani lu sha ai ngu mara the rim woi mat nna, htawng dam Shata 6 jahkrat da ai lam chye lu ai.
Salang Naw Li wa gaw, dai zawn Jinghpaw re ai Salang ni Langai hpang langai hpe Pyithutsi kaw na shapraw taw nga nna, dai ginra hpe shi up madu sha na matu shakut taw nga ai nga, ginra masha tsun ai re.