Putao ginra kaw Pyithutsit hpung shang da ai mung shawa ni hpe, Myen Hpyen dap Mawdaw hte hkan rim lahkawn nna, Hkawnglanhpu shawng lam de sa na matu galaw taw ai nga, ginra masha ni kaw na chye lu ai.
Putao Hkawng Lan Hpu ginra de majan byin taw nga ai, Shata 3 jan daram na wa ai ten, Myen Hpyen dap hte Pyithutsit maga, sum machyi law taw nga ai majaw, ya na zawn, mung shawa ni hpe bai hkan rim lahkawn wa ai masa re nga ginra masha langai KNG Shiga dap de n dai zawn tsun dan wa ai re.
“Hkawng Lan Hpu Shing Hkawng maga de Myen ni majan grai sum taw ai le, KIA KPF ni gaw, ginra madu re majaw, နယ်မြေကျွမ်းကျင် ai le. Myen ni gaw hpa n chye le, dai majaw, ya Pyithutsit ni hpe စုဆောင်းရေး bai galaw taw nga ai le,” nga tsun ai re.
Ndai laman hkan rim lahkawn woi la ai masha marai 200 ram hpe Majan byin taw nga ai Hkawng Lan Hpu maga de sa na matu bai hkyen shajin taw nga sai lam chye lu ai.
Shawng lam hpyen man de sa hkrum yang, asak shim lam hpe myit tsang ra ai majaw, ginra masha n kau hprawng koi yen tim, n ta kaw nga taw ai asak kaba sai ni hpe mung rim lahkawn woi mat ai lam chye lu ai.
