Myen Hpyen Asuya Jinghpaw Mungdaw n htoi masat lamang hpe, Asuya rung shawng tsing du pa kaw, dai ni kaw na manau nau baw let galaw hpang taw sai lam chye lu ai.
Dai Mungdaw Nhtoi masat lamang hpe Mungdan hkringmang Salang nkau hte Hpaji jaw ninghpum Salang ni, Jinghpaw mung Taimu galaw lai wa ai Du Kaba Usa ni yawng sa du shang lawm na lam, Hkyet Hting Nan hte ni nawn ai Salang ni kaw na chye lu ai.
“Jinghpaw Mungdaw Nhtoi hta Naypyidaw na Kongsi hpung shang salang ni ganoi yawng ngu na ram hte Moi Taimu galaw lai wa sai Dukaba Usa ni mung sa du lawm na da, Myen hku tsun ga nga yang, စည်စည်ကားကား hku galaw ai ga rai nga ai,” nga tsun dan ai re.
Myen Hpyen dap Jinghpaw mungdaw n htoi poi galaw nga ai ten laman hta, Myitkyina pru shang lam ni yawng hpe laja lana san jep ai lam ni galaw taw nga ai sha n ga, Mung shawa ni ding yang na lai taw ai lam kaba n kau hpe mung pat kau ai lam chye lu ai.
Myen HPyen dap daru magam zing kau ai hpang, Jinghpaw Mung masat n htoi lamang hpe Asuya rung shawng hta lagu lagyim rai na hkrai galaw taw nga ai gaw, dai ning rai yang, 5 ning du sai re.
Myen Hpyen dap hpe mung shawa madi shadaw ai lam n nga mat ai majaw, n dai zawn poi ni galaw dan masu let, mung shawa makam bai lu hkra galaw shakut taw nga ai lam re nga, mung masa yu maram ai ni tsun tawn ai re.
