Katha Muklum kata ya ten, Myen Hpyen La ni daw mi, PDF dap ni daw mi rai hpyen masa shaja hkat taw nga ai hta, Myen HPyen dap maga na Y-12 Nbungli Drone bawm shana shagu bawm sa jahkrat bun taw ai lam chye lu ai.
Ya ten Katha muklum kata Mung shawa n kau, tinang sut gan hpe n ja ai majaw ngam da ai ni mung nga ai rai tim, law malawng gaw, Myo shinggan de hprawng yen ma sai lam Ginra masha langai KNG de n dai zawn tsun dan wa ai re.
“Katha kaw ya ten gaw, PDF ni chyen mi, Myen ni Chyen mi dai hku nga taw ai, grai wa laja lana gap gasat hkat ai hku mung n re, Myen ni gaw shani shagu Drone, Y-12 hte bawm sa jahkrat taw nga ai, Ngam taw ai ni hpe mung n pru shangun, pru sai ni hpe mung bai n shang shangun dai hku rai taw ai ga rai nga ai,” nga tsun dan wa ai re.
Ya ten Katha muklum na masa lam gaw, nga taw ai ni hpe mung shinggan de n shapraw, pru mat sai ni hpe mung n jashawn mat rai mung shawa ni yak hkak taw nga ai lam tsun ai re.
Ndai laman Katha majan masa lam hta Myo kata gap gasat ai lam ni gan zim taw nga ai rai tim, Drone nbungli bawm jahkrat ai lam ni shana shagu galaw taw nga ai lam chye lu ai.
Maga mi de Katha Majan zim taw ai masa rai tim, Katha makau grup yin hkan na Muklum ni rai nga ai, Wun To, Hkin Oo maga ni de gaw laja lana gap gasat hkat ai lam ni byin taw nga ai re.
Ndai laman Sagaing Lahta Daw အမှတ်(၁) စစ်ဒေသ ginra kata hta majan laja lana byin wa na masa nga ai lam hpyen masa yu maram ai ni tsun tawn ai re.
