Myen Hpyen Dap bai shakut galaw na hkyen taw ai Mali Nmai Zup Madim masing hpe n lu galaw hkrang shapraw hkra rawt malan hpung ni maga makawp maga sa mat na lam, NUG Asuya tsun shaga ahkang lit nga, Salang Nay Hpung Lat tsun mat ai re.
January praw 6 ya shana Online n tsa hku na Mung shawa ni hpang de tsun dan ai Shiga lamang hta ya na zawn tsun mat ai rai nga ai.
“Ndai ten hta Mali Nmai Zup Madim Masing hpe bai galaw hpang wa ai ngu gaw, Gumshem Myen Hpyen dap daru magam ngang kang na matu Mungdan a Asak sai lam rai nga ai Mali Nmai Zup hpe dut sha kau ai lam re. NUG Asuya kaw na Mung Shawa the rau, Mali Nmai Zup hpe makawp maga sa mat na re,” nga tsun ai re.
Tara n shang Myen hpyen dap the Myit hkrum ta masat htu tawn ai kaning re ai munggyit mung tara n shang ai rai nna, sa du arang bang ai ni sha sum na re lam matut tsun mat ai re.
Mali Nmai Zup Madim masing hpe n dai ra lata poi ngut ai hpang, 2026 ning hta bai galaw hpang sa wa na matu, Myen Hpyen dap hte Miwa Company lapran Chyena Myit hkrum ta masat htu da ai lam nga ai hpe sagawn chye lu ai.
Myen Hpyen dap maga na mung, jaw da ai bungli ahkaw ahkang lam ni hpe, sak se sak gan n nga ai sha sa ninghkap ai gadai gara masha hpe rai tim, Tara Upade the mare ja ja ahkyak la sa mat na lam n dau da ai re.
Ya na zawn Myen Hpyen dap Mali Nmai Zup Hka Wan Jak madim masing hpe bai hpang na matu hkyen shakut wa ai lam gaw, shi a daru magam ahkang aya ngang gring lam a matu, dai the galai kau ai lam re nga ndai zawn matut tsun da ai re.
“Myen Hpyen dap kaw Shi a daru maga ahkang aya ngang kang na matu, Miwa hpe Hpa ai hku na bai galaw shangun wa ai ga rai nga ai lam,” tsun da ai re.
Mali Nmai Zup Myi hprap wan gaw gap na hka madim hpe Myitkyina the Deng 38 tsan ai shara hta gaw gap na matu hkyen shajin da ai mung rai nga ai.
Mali Nmai Zup madim masing hpe 2006 ning Tan Shwe Asuya lakhtak ten, myit hkrum ta masat htu da ai hpe 2011 ning Theing Tseing Asuya prat hta mung Shawa ni jawm ninghkap na bai dawm jahkring da ai mung rai nga ai.
Gumshem Myen hpyen dap 2021 ning hta daru magam zing kau nna, ya 2026 ning hta Mali Nmai Zup Myihprap wan madim masing hpe bai galaw na matu shakut taw nga ai lam mung rai nga ai.
