Katha Muklum kata Majan grai wa laja lana byin ai lam n nga tim, Myen Hpyen dap maga Drone Nbungli bawm shana shagu sa jahkrat bun taw nga ai lam ginra masha ni kaw na chye lu ai.
Myen Hpyen dap nbungli bawm hkrup mara hkan jahkrat bun taw nga ai majaw Mani Mung Shawa marai 2 bai si hkrum wa ai lam chye lu ai re.
Katha Majan masing gaw, Manmaw Majan hpe lagaw gang ai lam n re sha, mi na masing nga da chyalu hpe hkrang shapraw ai lam sha re ai nga, Hpyen masa yu maram taw ai Salang langai shi a ningmu hpe n dai zawn tsun dan wa ai re.
“Katha Majan gaw, mi na tim masing nga chyalu re, Nhpan kum masing ngu ai kaw lawm ai ginra langai rai nga ai, dai majaw, gasat ai ngu maram lu ai law,” nga tsun ai re.
က သုံးလုံး စစ်ဆင်ရေး masa lam a majaw, Wun To, Kaw Lin, Kanbalu hkan na mung shawa n kau hpe PDF dap ni maga na yen shangun ai lam ni nga taw sai lam ginra masha ni kaw na chye lu ai.
Dai ginra na mung shawa ni hpe January 6 kaw na 10 ya shani lawan yen na matu tsun da ai re lam matut sawk sagawn chye lu ai re.
Ya ten dai ginra hta majan byin ai lam n nga tim, Myen hpyen dap maga na gaw, Nbungli bawm jahkrat bun ai lam ni galaw taw nga ai rai nna, Mana yup tung ten mung KIA gasat zing da ai Mabeing mare kaba hpe nbungli bawm wa jahkrat bun ai re.
Myen Hpyen dap maga ya na zawn nbungli bawm nau wa jahkrat bun ai majaw, Katha mung shawa yawng Myo kata na hprawng yen ma ai rai nga ai.
Katha Hpyen yen masa lam the seng nna, ginra amyu shayi langai mung KNG shiga dap de n dai zawn tsun dai wa ai re.
“Ya gaw Mung shawa ni yawng, tinang man ang ai de hprawng yen ma nna, Myo kata kaw gaw lagut ni hkrup mara lagu la taw nga ma ai, mung shawa ni matsan mayen re ga rai nga ai, garum ningtum mung hpa n lu, dai hku tinang lu ai the gun sha na hprawng yen taw ai ga rai nga ai,” nga tsun ai re.
Katha Muklum hpe KIA woi awn ai PDF, SRA pawng hpawm dap ni December 28 ya shani kaw na htim gasat hpang wa ai gaw, dai ni ten du hkra gasat poi ni naw matut byin nga ai mung rai nga ai.
