Wunpawng Mungdan Shanglawt Asuya KIA Dapba 6 ginra Muse the Namhpakka mare lapran na Nam Um mare hta Kokang MNDAA dap ni Mung Shawa Lamu ga hpe sa kashun la nna, hpai da wang hpaw na matu hkyen shajin taw ai lam, ginra masha ni kaw na chye lu ai.
Nam Um ginra masha n re ai Kokang MNDAA hpyen du langai a matsun hte dai shara kaw ga htu shara nna, hpai da wang hpaw na matu galaw taw ai hpe, Jinghpaw ramma ni sa hkum pat ai kaw na shada htwi hkat ai madang byin wa ai lam ginra masha langai n dai zawn tsun dan wa ai re.
“Kokang Hpyen la ni sinat hpai shim lam la ya na, ga kanaw jak kaba hte htu shara taw ai hpe, mare masha ni sa ning hkap ai, dai kaw shim lam la ya taw ai hpyen la ni n tsa matsun hte galaw ai re nga, ga law hkat wa ai kaw na, htwi mung htwi hkat wa ma ai ga rai nga ai,” nga tsun dan ai re.
Kokang dap ni gaw, KIA shara re hpe chye nga ning len, hpaida wang hpaw mayu ai majaw, gadai hpe mung ahkang n hpyi ai sha January praw 4 ya shani kaw na hpyen hpung hte nawng yan shang wa ai re lam chye lu ai.
Nam Um mare gaw, Amyusha laknak lang rawt malan hpung hkum hkra nga ai ginra langai re majaw gaw, Kokang dap maga y ana zawn, shada jahkrup bawng ban hkat ai lam n nga na, mung shawa ni a lamu ga hta hpai da wang sa hpaw ai majaw, shada lapran kaw mang hkang kaba byin wa na hpe ginra masha ni myit tsang nga ma ai re.
Ndai lam hte seng nna, KIA the MNDAA Mung Shawa, brun masum hku na a tsawm bawngban hparan sa wa na lam mung nga ai hpe sagawn chye lu ai.
