Katha Majan byin ai hpang, Manmaw Majan Loi Yawm wa ai lam, Shawng Lam magam gun ni tsun
Katha de Majan byin wa ai ten, Manmaw de Majan loi yawm wa ai lam, shawng lam hpyen magam gun ni tsun ai re.
Manmaw Muklum hpe KIA Pawng hpawm dap ni December 25 ya shani kaw na laja lana bai htim gasat wa ai rai tim, December 28 ya shani Katha hpe PDF pawng hpawm dap ni majan baw gasat dat ai majaw, Manmaw maga de majan mahku n sen ni ram daw yawm mat ai nga, shawng lam hpyen magam gun langai KNG shiga dap de ndai zawn tsun dan ai re.
“Katha de Majan byin na kun, Anhte de gaw, dai ni loi tsamai taw nga ai, laknak kaba chyawm ding yang ngoi ai le.” Nga tsun ai re.
Ndai laman Manmaw kata hta gaw grai wa gap hkat ai lam gaw n nga ai, laknak kaba gap shapyen bun hkat ai madang ram sha re, Laknak kaba chyawm shani shagu gap bun hkat taw ai, nga tsun dan wa ai re.
Katha muklum hpe KIA woi awn ai pawng hpawm dap ni kaw na December 28 ya shani kaw na htim gasat hpang wa ai gaw, dai ni ten du hkra Katha Hpyen dap Hk.M.Y (309) makau grup yin kaw laja lana gap gasat hkat taw ai lam chye lu ai.
Myen hpyen dap maga na mung shana shagu, Y-12 Nbungli, Mi 35 Helicopter kaw na Rocket ni hte wa gap bun nga ai re.
Myen Hpyen dap maga na dai zawn n bungli the hkrup mara gap shadam bun ai majaw, January praw 3 ya shani Katha Lawk 9 na, mung shawa marai lahkawng asak si hkrum wa ai re.
Myen Hpyen Nbungli bawm a majaw, Katha muklum mung shawa dum n ta law law hten za hkrum taw sai hpe mung chye lu ai.
Ya ten Katha Hpyen Yen mung shawa ni gaw, tinang jinghku jingyu ni nga ai maga de man yawng nna, hprawng ayai jawng taw ai re majaw. Du wa ai hpyen yen ni hpe hkap garum la na matu Katha hpyen yen mung shawa ni tsun da ai re.
