Wunpawng Mungdan Shanglawt Asuya Sadung Mare kaba kaw dung ai Shagyit hta, Mawdaw la ni kaw na ladu lai gumhpraw hta taw nga ai majaw, Mawdaw madu ni yak hkak hkrum taw nga ai lam Mawdaw madu ni tsun ai re.
Maina hte Kanpaiti lam lapran kaw sha KIA shagyit 10 jan nga ai lam chye lu ai.
Langu htaw mawdaw ni kalang lung wa yang, langu htaw manu Miwa gumhpraw 3000 hkawt jaw ra ai sha n ga, laga gabaw hpan amyu myu the mung jaw bang ra ai hta lai nna, Mawdaw langai laning mi na matu Sen 25 bai kahtap hpyi taw ai majaw, Mawdaw la ni yak hkak taw nga ai lam tsun dan wa ai re.
“Shanglawt ni kaw ahkun n kam bang na tsun ai n re, nau wa ladu lai ai, laning mi na matu Madaw langai Sen 20 jan mung bang da sai, langu mawdaw kalang lung yang mung Company kaw na gade nga na jaw da ai, dai hpang lung wa shagu mung Simai manu the laga gabaw amyu myu the hta ai, Sen 10 daram nga ai,” nga tsun dan wa ai re.
Sadung kaw dung ai Dung 3 Shagyit kaw, Mawdaw langai laning mi na matu Sen 25 hta taw nna, Voucher hta gaw Sen 20 sha ka ya ai lam matut chye lu ai re.
Wunpawng Mungdan Shanglawt Asuya kaw na, ahkun hkan se hte seng ai policy ni hpe a tsawm tup hkrak shagreng na galaw na hpe mung shawa ni ra sharawng taw ai lam matut tsun ai re.
Waimaw kaw na Kanpaiti de langu mawdaw kalang lung yang lam lapran laknak lang wuhpung yawng hpe jaw ra ai hkawn kang Sen 30 daram nga ai majaw, Mawdaw madu ni yak hkak hkrum taw ai lam KNG de tsun dan wa ai re.
