Lapu Hka Maw De Ngam Da Ai Jak Rai Ni Hpe Shaw Shangun Na Mung Shawa ni Myit Mada
Danai Lapu Hka de Min Zay Thant Pyithutsit woi awn ai Hpyen hpung ni htim gasat shang wa ai majaw, Maw ginra hta galaw lu galaw sha nga ai mung shawa ni yawng, jak rung jak rai ni kabai tawn kau da na, hprawng yen mat ai majaw, ya ten dai arung arai ni hpe bai lu shaw la na matu Myit mada la nga ma ai lam Maw Ginra masha ni tsun ai re.
Maw Ginra na mung shawa yawng gaw, lu lawm ai arung arai ni yawng, dai kaw kabai kau da ai majaw, ya ten gara de mung galaw hkawm sa wa na re n chye yak hkak taw nga ai majaw, laknak lang wuhpung lahkawng maga na Mung shawa hpe myit ya ai hku na, n htoi aten ladaw mi masat ya nna, rai zing la na ahkang jaw ya na hpe ra sharawng ai lam, Maw ginra na Bungli madu langai KNG de n dai zawn tsun ai re.
“ tsun mayu ai gaw, laknak lang lahkawng maga na mung, Mung Shawa ni a matu a tsawm myit ya let, arung arai shaw la na n htoi hpe masat ya yang kaja ai le i. n htoi 10 ya rai yang 10 ya, bat lahkawng ram rai rai, aten lahkawng masum ya sha chyawm gara hku n law ai, majoi hta htaw mai ai rai ni n re majaw gaw,” nga tsun ai re.
December 31 ya shani hta mung, Woi Law Mung shawa ni hprawng yen taw nga ai shara hpe shading nna, Min Zay Thant Pyithutsit ni Drone bawm sa jahkrat bun wa ai lam nga ai hpe matut chye lu ai.
Drone bawm a majaw masha gaw hpa n byin tim, dai kaw tawn da ai Jak rai ni hkra hten wa ai lam chye lu ai re.
Mung Shawa ni tawn shakram kau da ai arung arai ni hpe Drone bawm hte hkan jahkrat jahten wa ai masa re nga maw masha ni tsun maram nga ma ai re.
Min Zay Thant Pyithutsit hpung ni Hpyen n gun kaba hte shang wa na, Jak rung jak rai ni yawng hpe jahten kau ma ya na mung shawa ni myit tsang taw nga ma ai re.
Danai Lapu Hka, Pat Maw ginra de Min Zay Thant wa gaw, Jinghpaw Mung Taimu galaw lai wa na, Ya Naypyidaw Myen Hpyen dap daju kaw nga taw ai ဒုတိယဗိုလ်ချူပ်ကြီး တေဇကျော် the matut mahkai galaw na htim gasat taw nga ai re lam chye lu ai.
တေဇကျော် wa Jinghpaw mung Taimu galaw taw nga ai ten, Min Zay Thant the grai hku hkau, makam lu wa ai nga, Myen Hpyen dap the ni nawn ai ni tsun dan ai re.
Min Zay Thant Pyithutsit woi awn ai Hpyen Hpung ni gaw, Danai lapu Hka, Pat Maw ginra de December 13 ya shani kaw na Drone Nbungli ni hte laja lana htim gasat shang wa ai mung rai nga ai.
