Katha Muklum kata kaw Myen Hpyen Dap ni n dai laman shana shagu Y12 Nbungli hte Mi 35 Helicopter ni the laja lana gap sharu bun taw nga nna, Mung Shawa dum n ta law law hten za hkrum taw ai nga, Katha ginra masha ni tsun ai re.
KIA hte PDF Daphpawm hpung ni Katha muklum hpe December 28 ya shani kaw na htim gasat taw nga ai gaw, Dai ni ten du hkra majan laja lana gap gasat taw nga ai mung rai nga ai.
“Shani Shagu nut hkat taw nga ma ai, Mung Shawa yawng hprawng pru ma ai hte, lagut ni gaw kabu gara Myo kaw kam ai hku lagu sha jawng taw nga ma ai da.” Nga tsun ai re.
Myen Hpyen Nbungli bawm a majaw, Pattamya gat hte Masat 2 lahta tsang jawng, Mung shawa dum n ta n kau wan hkru hten taw sai lam chye lu ai.
Ya ten, Katha Myen Hpyen dap law malawng hpe Dap hpawm maga na wang da ai majaw, Myen hpyen dap ni n lu pru na, shana shagu Y12, Mi 35 ni hte Sa gap bun taw ai lam re nga, ginra masha ni tsun ai re.
Ya ten Katha ginra masha ni yawng gaw, tinang man ang ai shara ni de hprawng yen ma sai rai nna, Hpyen yen ni hpe hkap garum madi shadaw la na myit mada nga ma ai re.
Katha Hpyen yen mung shawa ni gaw, Pin Way Monyin maga de hprawng ai law ai zawn, Me Za Mandalay maga de mung hprawng yen ai ni law ai hpe chye lu ai re.
Ndai laman Katha muklum hpe htim shagrawt gasat ai hta masan sa Awng Dang ai lam nga ai rai tim, gara hku kaning rai awng dang ai ngu hpe gaw n chye lu ai re.
