Myen Hpyen dap ra lata poi n lu galaw ai, KIA Uphkang ginra Njang Yang mare kaba hpe Myen Hpyen Nbungli bawm jahkrat bun ai majaw, mung shawa marai 4 hkala hkrum wa ai lam, ginra masha ni kaw na chye lu ai,
December 28 ya shana hkying 9 aten daram hta, Mali Nmai Walawng Njang Yang Ginwang, Tangbau Yang mare hpe Myen Hpyen Jet Fighter Nbungli langai the bawm wa jahkrat bun wa ai majaw, mung shawa dum n ta lahkawng hkra hten mat nna, mung shawa marai 4 hkala hkrum wa ai nga ginra masha langai KNG de n dai zawn tsun dan wa ai re.
“Myitkyina kawn rawt lung wa ai Jet Nbungli Tangbau Yang mare kaw bawm wa jahkrat bun da di nga ai re mu, shana kashung ai majaw, wan jawm kra taw ai kaw wa ang ai majaw, marai 4 hkala hkrum wa ai re, dai hpang Tang Hpre Myen Hpyen dap kaw na mung, laknak kaba 4 lang gap shadam bun wa ai,” nga tsun dan ai re.
Myen Hpyen Nbungli bawm a majaw, dum n ta lahkawng yawng hten mat ai rai nna, hkala hkrum ai mung shawa ni a masa lam hpe gaw, matut sagawn nga ding yang re.
Myen Hpyen Nbungli bawm wa jahkrat bun da ai the rau Tang Hpre Myen Hpyen dap maga na mung laknak kaba 4 lang gap bun wa ai hpe chye lu ai.
Tangbau yang mare gaw, Mali Nmai lapran kaw nga ai mare kahtawng rai nna, Myen Hpyen dap hte KIA dap lapran 2018 ning majan byin wa ai ten kaw na hprawng yen mat ai mare kahtawng rai nna, ya ten dai mare hta Ja htu sha ai mung shawa n kau hte yi sun galaw ai mung shawa n kau wa nga taw ai hpe chye lu ai.
