Pat Maw Ja Maw Ginra Yawng Hpe Min Zay Thant Pyithutsit Jum Tek Kau mayu na htim gasat taw nga
Pat Maw Hpe Min Zay Thant Pyithutsit ni Up madu mayu nna, Naypyidaw hte pawng na htim gasat taw nga ai masa re lam maw ginra na mung shawa nit sun ai re.
Min Zay Thant gaw, Mying kaba ai Lapu Hka Ja maw the Pat Maw ginra na gumhpraw ni Danai D.K.Ts de shang taw ai hpe yu manawn na, Naypyidaw Myen Hpyen dap daju na Dukaba ni hte pawng na, Danai hpyen dap hpe lai nna, htim gasat taw nga ai masa re lam, maw ginra na Lauban langai n dai zawn tsun dan ai re.
“Min Zay Thant Pyithutsit gaw, ndai kaw na shang gumhpraw ni Danai D.K.Ts de shang ai n ra na, Shi kaw shang na matu, Naypyidaw na Myen Hpyen Dukaba ni the makyit mahkai na nut ai rai na masa nga ai,” nga tsun ai re.
Myen Hpyen Dap hte Warazup Pyithutsit hpung ni pawng nna, Pat Maw Noi Je Bum Hka Lawng Kawng maga de nbungli bawm jahkrat ngut ai hpang, Lagaw dap n gun kaba hte htim gasat wa ai majaw, Hka Lawng Kawng Post hpe gan yen kau da sai lam chye lu ai.
Pat Maw hte Mying kaba ai Lapu Hka Ja Maw hpe Myen Hpyen dap maga ya na zawn, laja lana htim gasat wa ai lam gaw, Maw ginra nga ai mung shawa ni yawng hpe Sindan pa wa bang shangun mayu ai majaw, shing n rai, Pat Maw hpe bai zing madu la mayu na, ya na zawn htim gasat wa ai masa re lam, ginra masha ni tsun maram tawn ai re.
Myen Hpyen dap maga, Pat Maw hte Ja Maw ginra hpe htim gasat wa ai majaw, Maw ginra na mung shawa ni yawng hprawng yen ma sai lam chye lu ai.
Pyithutsit hpung ni gaw, Majan byin na hprawng yen pru wa ai mung shawa ni hpe hpyen ning gang shatai jang lang wa ai nga, Lapu Hka na Gat dut amyu shayi langai n dai zawn tsun ai re.
“Majan byin na anhte hprawng pru wa ai shani gaw, Myen Hpyen Tsit Kyaung ni the hkrum ai le, မင်းတို့သေချင်လား ဒီကိုလာခဲ့ nga di shanhte the rau woi gawp taw ai, dai kaw, KIA mag ana rai sam ai Drone bawm langai wa hkrat ai majaw, anhte pru wa ai marai 80 ram re kaw na marai 6 hkala ai, shan hte gaw dai shani shani ting anhte hpe hpyen ninggang hku woi da na, shana jan du yang she lai yu wa shangun ai,” nga tsun dan ai re.
Noi Je Bum hpe Jet Nbungli hte bawm wa jahkrat ai hpang, shani shagu ngu na ram, Myen Hpyen dap maga na Drone bawm jahkrat bun ai majaw, mung shawa si hkala lam ni mung nga wa ai re.
December 18 ya shani hta mung Myen Hpyen dap ni jahkrat ai Drone Bawm si Payin Maw lam numbraw Lisu Kawng kaw wa hkrat ang ai majaw, dai kaw Ja gayin taw nga ai mung shawa langai si nna, marai langai hkala hkrum wa ai re.
Myen Hpyen Dap hte Pyithutsit na Pat Maw ginra de laja lana htu shadut wa ai majaw, KIA pawng hpawm dap maga, December 24 ya jahpawt Danai D.K.Ts dap hpe laknak kaba sa gap bun ai hta, Myen hpyen dap maga hkra machyi lam law wa ai majaw, dai shana maga de jang, Dapba (2) ginra de Jet Nbungli hte bai sa gap bun wa ai lam chye lu ai.
Mying kaba ai Lapu Hka Ja Maw hte Pat Maw ginra hpe Min Zay Thant woi awn ai Pyithutsit hpung ni December 13 ya shani kaw na nbungli the shawng htim gasat hpang wa ai kaw na majan laja wa ai mung rai nga ai.
Hugawng Danai Lido lam kaba a sinpraw maga Pat Maw the Ja Maw Ginra ni yawng hpe KIA dap maga 2024 July Shata daram hta yawng htim gasat zing madu kau wa lu ai mung rai nga ai.
