Manmaw Hk.L.Y (47) Dap Shawng Na Mung Shawa Dum Nta Yawng Hpe Myen Hpyen Dap Nat Jasan
Manmaw kata n dai laman Majan grai wa laja lana gap gasat hkat ai lam n nga tim, Myen hpyen dap maga mung shawa dum n ta hkan nat jahten hkawm taw nga ai lam, shawng lam hpyen magam gun ni tsun ai kaw na chye lu ai.
Ndai laman Hk.L.Y (47) dap hpe KIA hte pawng hpawm dap ni laja lana htim gasat wa ai majaw, Hpyen dap man na dum nta ni hpe shatsai wa ai masa re lam, n dai zawn tsun dan wa ai re.
“ Ndai laman Hk.L.Y(47) makau grup yin kaw htim taw ai ga rai nga ai, Myen ni hpyen dap makau hkan na n ta yawng nat shatsai taw nga ai, anhte ni htep lung wa ai hpe asan rai mu na matu jasan ai ga rai nga ai,” nga tsun dan wa ai re.
Lai wa sai December 19 ya shani kaw na Kung Mahan lawk hte Hk.L.Y (47) dap makau hkan na mung shawa dum n ta ni yawng hpe hkan nat jahten hkawm wa ai re lam chye lu ai.
Manmaw majan hta Myen Hpyen dap gaw, shan hte a dap shara ni hpe makawp maga na matu, makau grup yin ni mung shawa dum n ta ni yawng hpe nat jahten kau ma nna, makau grup yin akrin rai mat hkra tawn na makawp maga taw ai lam chye lu ai re.
Lai wa sai shaning hta mung Manmaw Myen Hpyen Dap daju Ts.K.Hk (21) hpe makawp maga lu na matu, makau grup yin hkan na dum n ta ni yawng hpe nat jahten wa ai rai nga ai.
Ya n dai laman KIA hte Pawng hpawm dap ni Manmaw Hk.L.Y (47) hpe laja lana htim gasat wa ai hpang, ya na zawn, dap makau grup yin na mung shawa dum n ta ni yawng hpe bai nat jahten wa ai lam mung rai nga ai.
Manmaw htim gasat majan gaw, ya laning mi jan wa ai rai tim, gasat poi matut byin nga ding yang re lam chye lu ai.
