Manmaw Man Malin mare Gawdin Pa kaw Myen Hpyen Nbungli bawm wa jahkrat bun ai majaw, Hpyen Yen mung shawa marai 5 hkala sawng wa ai lam chye lu ai.
December 22 ya shana de hkying 4 chyen ten daram hta Man Malin Mare Gawdin pa kaw Jet Nbungli bawm wa jahkrat bun ai majaw, dai kaw hpyen yen nga ai Mung shawa marai 5 hkala sawng hkrum wa ai lam ginra mung shawa langai KNG Shiga de n dai zawn tsun dan wa ai re.
“Anhte Manmaw Hpyen yen ni hprawng yen taw nga ai Man Malin mare gawdin pa kaw wa jahkrat bun kau da ma ai, marai 5 re, dai ni hpe Laiza Mung shawa tsi rung de htaw sa da lu sai,” nga dai ginra na hpyen yen ni hpe yu lakawn taw ai magam gun hpung Sara langai KNG shiga de tsun dan wa ai re.
Man Malin mare gaw, Mali hka Sinna hkran maga de ang ai rai nna, Manmaw Hpyen yen mung shawa ni law malawng yen ai ginra mung rai nga ai.
Nbungli bawm a majaw, hkala hkrum ai ni gaw, .Jan, Waje Bawk asak (70)ning .Jan, စိန်ထွေး asak(40)ning,. Jan, မီးမီး asak(26)ning. မ စုလင်းလက်ထွန်း asak(13)ning hte laga mying n chye ai marai langai ni re lam chye lu ai.
Dai Hkala sawng hkrum ai hpyen yen ni hpe Mung Shawa tsi rung de a tsawm sha wa sa da lu sai lam matut chye lu ai re.
Myen Hpyen dap maga ya na zawn Hpyen yen mung shawa ni hpe shading na bawm wa jahkrat bun ai lam gaw, Mungkan hpyen tara hpe tawt lai ai lam re nga, Hpyen masa hpe masam maram nga ai ni tsun da ai re.
Mana de Manmaw Man Malin kaw wa jahkrat ai sha n ga, KIA Dapba 8 ginra de mung wa jahkrat bun kau da ai lam matut chye lu ai re.
