Mogok ginra de Myen Hpyen dap hpe Balawng TNLA dap ni shim lam la ya na woi shang wa ai rai tim, Myen Hpyen dap maga na ya ten du hkra dap shara a tsawm rai n lu jahkrat shi ai majaw, Mogok muklum kata Asuya gawng rai n lu kri shi ai lam, Mogok ginra masha langai KNG shiga de tsun ai re.
Ya ten Myen Hpyen dap ni mung shan the a dap shara hta, rai n lu wa dung shi ai zawn, rawt malan hpung ni maga na mung lam lapran hkap shingla gasat ai lam ni galaw taw nga ai majaw, majan shani shagu ngu na ram matut byin taw ai lam chye lu ai.
Ya ten Mogok kaw Asuya gawng hpa mung rai n lu kru shi ai masa lam the seng nna, ginra masha langai KNG Shiga de n dai zawn tsun dan wa ai re.
“Mokok kaw gaw Hpa Si Pin mung n nga ai, Balik mung n nga, Asuya hpa n nga ai, gadai mung gadai chye ai hku nga taw ga rai nga ai,” nga tsun ai re.
Mogok muklum ginra kata, ya na zawn majan matut byin taw nga ai majaw, muklum gawn hkang na asuya n nga, hkrup mara wang lu wang lang nga jawng taw ai lam, matut tsun dan ai re.
Ya ten, Mogok gaw, Sipin mung n nga ai, Uphkang rung mung n nga ai, dai majaw, maza ni mung hkrup mara kam ai hku gabai na, maza mala she byin jawng taw sai, nga tsun dan wa ai re.
Ya na zawn, Mogok ginra kata shani shagu majan matut manoi byin taw ai majaw, Muklum hten za ai ni mung grau law wa taw nga ai lam sa gawn chye lu ai re.
Mogok hpe Balawng TNLA dap ni Myen Hpyen lata de ap kau na lam myit hkrum wa ai hpang, Mogok hpe Rawt malan PDF dap maga na matut ninghkap na lam n dau wa ai the maren, ya ten, shan the lu da ai laknak arung arai ni the ninghkap shingla gasat taw ai masa re lam, hpyen masa yu maram ai ni tsun da ai re.
