Miwa Gumsan Mungdan, Yunnan Mungdaw, Myen Mung the seng ai Datkasa Salang Li Chen Yang, woi awn ai hpung ni gaw, Wunpawng Mungdan Shanglawt Asuya Ginjaw ginra Laiza Mung Seng Yang Mare kaw KIO Ginjaw Komiti hte sa hkrum jahta wa ai lam chye lu ai.
Dai hkrum jahta ai lam hta madung, Myen Hpyen Ra lata poi hpe jahten sharun dingbai dingna jaw ai lam n galaw na hte, Manmaw majan lam ni hpe madung hkrum bawng ban na masa nga ai lam, Salang langai tsun maram tawn ai re.
“Nan nan sha re, lak lak lai lai hpa chye jahta na? Ra lata poi hpe n jahten ya na matu, Manmaw Majan shazim na matu, galoi mung tsun taw ai lam ni rai na re,”nga tsun dan wa ai re.
Miwa Asuya ni, Laiza de rai n sa ai shawng shani hta sha Myen Hpyen Ningtau Ningbaw Soe Win wa Myitkyina de sa du nna, Ra Lata poi galaw na the seng na sa sang lang mat ai lam mung rai nga ai.
Miwa Asuya ni Laiza sa ai gaw, December 17 ya shani rai nna, Soe Win wa Myitkyina sa ai gaw, December 16 ya shani re lam chye lu ai.
Ndai masa hpe yu maram yu yang, Myen Hpyen dap the Miwa ni jahkrum la nna, Jinghpaw mung kaw galaw na Ra lata poi hpe dingbai dingna jaw ai lam n galaw na matu sa tsun ai masa re nga, Mung masa yu maram ai ni tsun da ai re.
Miwa hte Myen Hpyen Ningtau Ningbaw ni Jinghpaw mung sa du ai hpang, Jinghpaw Mung kata na KSPP Party wuhpung ni hku na mung, Jinghpaw mung kata galaw mat na ra lata poi hpe ding bai ding na jaw ai lam n galaw na matu December 19 ya shani n dau laika langai shapraw da ai re.
