Myen Hpyen dap ni, Pat bum hpe bai htim gasat zing madu la lu na matu, nbungli laknak kaba hpan hkum jai lang nna, Hpyen n gun kaba hte htim gasat wa ai majaw, Hka Lawng kawng Dap shara hpe yen kau ra mat ai lam ginra masha ni kaw na chye lu ai re.
“Ya the n nan htim gasat ai hpang shani jang, Hka lawng kawng hpe tat kau sai nga tsun ai, Min Zay Thant ni Drone Nbungli a majaw, n dang hkam yen kau da ai ga rai nga ai,” nga dai Maw kaw na Salang langai tsun ai re.
Lapu Hka Ja Maw makau grup yin ni hta dai hpawt manap hkying 5 aten daram hta mung gap gasat hkat taw nga ai lam matut chye lu ai.
Myen Hpyen dap the KIA maga ndai laman Hpyen masa shaja hkat wa ai majaw, lapu Hka Ja maw kaw nga ai mung shawa ni yawng hprawng pru ma ai sha n ga, gat seng ni mung yawng pat ma sai lam, Lapu Hka maw kaw Ja htu nga ai lauban langai KNG shiga de tsun dan wa ai re.
Lai wa sai bat kru ya shani Myen Hpyen dap ni Noi Je Bum mayan hta Nbungli hte laja lana wa gap bun ai hpang, ndai laman gaw, Nbungli hte wa gap ai lam n nga tim, Drone laknak kaji ni the shani shagu matut gap gasat hkat taw ai lam chye lu ai.
KIA Dung 14 ginra rai nga ai, Lapu Hka Ja Maw the Pat Maw, Nambyu Nam Hkam ginra ni hpe KIA PDF dap ni 2024 ning June Shata laman ni hta gasat zing kau ai mung rai nga ai.
