Majan Byin ai lam n nga tim, Myen Hpyen dap Waimaw Hkran de Laknak kaba gap bun nga
December 14 ya shana Yuptung ten Majan byin ai lam n nga tim, Myitkyina Myen Hpyen dap daju M.P.Hk kaw na Waimaw Shwe Nyaung Pin 321 maga de, laknak kaba 10 lang jan gap bun wa ai nga, ginra masha ni tsun ai re.
Myen Hpyendap maga na Waimaw Ginra kata Ralata poi galaw lu hkra yaw shada ai hte, mana kaw na laknak kaba gap shadam bun taw sai re lam, ginra masha langai KNG Shiga de n dai zawn tsun dan wa ai re.
“ Waimaw gaw Ralata poi galaw na ginwang kaw lawm ai le, dai majaw hpa majan n nga tim, laknak kaba ni gap bun taw nga ai. Shwe Nyaung Pin hkan gaw Mung Shawa mung gadai n nga sai,” nga tsun dan ai re.
Waimaw Ginwang gaw, Myen Hpyen dap galaw na Ralata poi hta, Numdaw lahkawng lang galaw na hta lawm ai ginwang rai nga ai.
Myen Hpyen dap gaw, Ralata poi lu galaw na matu ya kaw na Hpyen masa lam hku na shamu taw ai re lam ginra masha ni tsun maram da ai re.
Shwenyaung Pin Myen Hpyen Dap Hk.M.Y (321) dap hpe Wunpawng Mungdan Shanglawt Hpyen Dap KIA hte Pawng hpawm dap maga May 21 ya shana daram hta padang dip zing madu kau ai hte rau, Aungmye 1,2 ginra ni yawng hpe gasat zing madu mat wa ai rai nga ai.
