Myen Hpyen Laknak kaba a majaw, Mung Shawa marai 2 si nna, marai 5 Hkala hkrum wa
Hpakant Myen Hpyendap Tatma Kawng kaw na gap shadam bun dat ai laknak kaba a majaw, asak lahkawng ning re Ma kaji langai the dinggai langai asak si hkrum wa nna marai 5 hkala hkrum wa ai lam ginra masha ni kaw na chye lu ai.
November 20 ya shana Yuptung hkying 11 chyen daram hta Hpakant Tatma kawng na gap dat ai laknak kaba si langai Seng Tawng mare Asia Auto Service lai kaw wa hkrat ai majaw, dai kaw nga ai asak 2 ning re ai ma kaji the hpawmi dinggai langai si hkrum wa ai nga Hpakant ginra amyu shayi langai KNG shiga de tsun dan wa ai re.
“Mana gaw anhte nga ai makau kaw sha laknak kaba wa hkrat ai, n ta htingbu makau na Myen n ta na hpawmi langai hte Ma langai si ai, laga ni mung hkala ma ai, laknak wa hkrat ai n ta gaw hten ai ga rai nga ai, hpri pa ni yawng waw ma n ta kau chye mi mung hten re ga rai nga ai,” nga tsun da ai re.
Hpakant ginra Myen Hpyen dap laknak kaba majoi hkrup mara nau gap shadam bun wa ai majaw, dai ginra na Kanu Kawa Nkau hte Sutdu lauban ni Tatma Mu hpe Gumhpraw buri 3 wa jaw nna, laknak kaba gap shadam bun ai lam n galaw ya na matu wa tsun jahkrup da ai lam nga ai hpe ginra masha ni kaw na chye lu ai.
Lai wa sai bat lahkawng ram hta gumhpraw wa jaw da ai Tatma mu galai mat ai majaw, ya tatma mu nnan du ai bat mi jan na ai hpang, ya na zawn laknak kaba bai gap bun wa ai masa re lam n dai zawn matut tsun dan ai re.
“Lai wa sai ten mung ya na zawn laknak kaba majoi nau gap shadam bun ai majaw, Myitsu kanu kawa salang ni gumhpraw buri masum wa jaw na tsun jahkrup na zim mat ai rai nga ai, ya byuha mu nnan bai galai sai nga, masha galai mat jang mana kaw na bai gap taw sai ga rai nga ai,” nga tsun ai re.
Hpakant ginra de lai wa sai May Shata kaw na Myen Hpyen hpung ni bai du shang wa ai kaw na hpyen masa shaja hkat wa ai kaw na laknak kaba shani shana gap shadam bun ai majaw, mung shaw si hkala ai lam mung jahkring hkring byin wa ai rai nga ai.
Ndai laman Hpakant ginra hta Hpyen masa shaja hkat ai lam grai wa n nga sai rai tim, Myen Hpyen dap maga ya na zawn, mara kata mung shawa ni nga ai shara de laknak gap shadam bun wa ai rai nga ai.
