Hpakant Mawsiza hte Tar Yar Kung Kate maw sa wa lam makau na Kani dut mari lusha ai dabang langai hpe Hpakant ginra Patjasan Komiti kaw na woi awn ai hte sa rim hpya ai lam galaw wa ai nga, dai kaw na lit nga ai Salang langai KNG shiga dap de tsun dan wa ai re.
Dai shara gaw, Kani ya marai 100 jan 200 shani shagu pru shang rai wang lu wang lang dut mari lu sha taw nga ai shara re lam chye lu ai.
Dai shara hta Kani dut mari lu sha ai masha ni wang lu wang lang grai law wa ai majaw, ginra masha ni a matu shim lam n nga wa ai majaw sa rim hpya ai re nga, dai kaw na lit nga ai Salang langai KNG shiga de n dai zawn tsun dan wa ai re.
“Ndai Shara kaw gaw Mung Shawa ni Nsen n htoi n lata galoi mung hkawm sa taw ai shara hta Poi dabang hpa wang lu wang lang grai dut mari lu sha wa ai majaw, Mung Shawa shim lum lam a matu rim ahkyak la wa ai re,” nga tsun ai re.
Dai hpawt Kani dabang sa rim hpya ai hta dai kaw dut mari lusha taw nga ai Kani ya marai 100 jan hpe Tung Fung Mawdaw kaba lahkawng the dawn jasan dabang de rim woi mat ai lam chye lu ai.
Lu Sha ai masha n kau hpe gaw bai dat dat ya sai rai tim, dut mari hpaga galaw ai ni hpe gaw, lu rim da ai Kani nang hpam sakse ni the hkrak htawng jahkrat mat wa na lam nga ai hpe chye lu ai re.
Kani ya ni hpe Mawdaw kaw yawng rim htaw mat wa ai lam gaw, ya ten na Hpyen masa hpe myit tsang ra ai majaw, shim ai shara de woi mat ai masa re lam the seng na n tsa na salang wa n dai zawn matut tsun ai re.
“Anhte dai Kani Ya ni hpe woi mat ai ngu gaw Kani dap yawng hpe wan nat jahten kau ai ten,dai shara kaw na Wan hkut pru na, Myen Hpyen dap laknak kaba Drone bawm ni sa jahkrat bun na hpe tsang ai majaw, Kani Ya ni yawng hpe shim lum ai shara de Mawdaw hte rim woi mat ai re,” nga matut tsun ai re.
Kani nang hpam gaw amyu sha yawng a hpyen madung re majaw gaw, ya na zawn kani nang hpam pat jasan ai magam bungli hpe Magam dap ni hte lata gindun na rau jawm galaw ai re lam chye lu ai.
Hpakant ginra hta, Kani lu sha ai masha lani the lani grau grau law wa ai zawn, Kani mari lu ai lam hta mung, wang lu wang lang dut mari ai lam ni galaw taw nga ai lam chye lu ai.
Hpakant kaw ya ten Kani hpraw lap 500 na pyi mai mari lu taw ai zawn, Yama hkyep tawng mi hkying mi jan sha jaw ra ai lam matut chye lu ai.
Hpakant ginra hta dai zawn Kani dabang ni hpe ginra pat jasan hku na rim ahkyak la ai lam jahkring hkring galaw wa ai rai tim, daru magam ahkang aya nga ai ni kaw na ta tut a tsawm ahkyak la ai lam n nga ai majaw, Kani dut mari lu sha ai ni grau grau law wa ai re nga, ginra masha ni tsun maram da ai re.
Myen Hpyen dap daru magam zing kau ai hpang Mungdan ting madang hta kani nang hpam lu sha ai masha ni grau grau law jat wa taw ai mung rai nga ai.
