Myen Drone bawm a majaw, Sah Maw Mare masha hkauna yi wa kaw si taw ai mabyin byin wa ai lam, ginra masha ni kaw na chye lu ai.
November 15 bat kru ya jahpawt Sah Maw Mare na Nhkum La a hkauna de Kashu wa du jahkrum ai ten, dai yi wa kaw hkauna galaw nan ga ai Nhkum La hte Nchyang galaw ai Myen la yan dai hkauna yi wa hta bawm hkyep the rai si taw ai lam, ginra masha ni KNG de tsun dan ai re.
“Bat kru ya jahpawt Kashu gaw hkauna de kaji dwi hpe lusha wa sa let, wa jahkrum na matu lung wa ai ten, yiwa kaw bawm hkyep the rai si taw ai nga wa tsun dan ai, ndai laman dai mayan de Drone grai pyen ai nga tsun ai, makau na ni tsun aigaw, bat mali ya shana laknak kaba hkrat ai nsen gaw na ai nga tsun ai.,”nga tsun dan ai re.
Kaji Dwi Slg Nhkum La gaw, Yi wa kata si rawng taw nna, shi the rau nga ai Ngamyo wa gaw, Yiwa shinggan kaw si taw ai lam chye lu ai.
Gara hku kaning rai byin ai ngu hpe a tsawm tup hkrak n chye lu ai rai tim, bawm hkyep hkrep hkra ai lam hpe maram yu yang bat mali ya shana ngoi ai laknak kaba hte si ai masa re lam ginra masha ni tsun maram da ai re.
Asak si hkrum ai yan gaw, asak 68 ning re ai Slg Nhkum La hte Asak 30 ning re ai Ngamyo ngu ai yan re lam chye lu ai.
Salang Nhkum La gaw, Sah Maw mare hte deng 3 ram tsan ai Sut Nyen Pa ngu ai shara hta hkauna, nga rem rai di nga ai dingla re lam chye lu ai.
Ndai laman Sah Maw Hkauna pa grup yin hta Myen Hpyen dap drone jahkring hkring pyen taw nga ai hpe maram yu yang, Myen Hpyen dap drone bawm jahkrat bun hkrum ai masa rai na tai ai nga tsun maram tawn ma ai re.
Dai ginra hta gaw, Myen Hpyendap Hk.L.Y (105) n pu dapdung (283) (384) the Sam Hkyeng SNA ni shamu shamawt nga ai ginra re lam mung chye lu ai.
