Putao Machyang Baw mare Mali Hka kau kaw Myen Hpyen hpung ni hpe KIA KPF ni hkap wang gasat ai hta, Myen Hpyen dap maga sum machyi law wa nna, Tang Ja maga de hprawng yen mat wa ai nga, shawng lam hpyen magam gun ni kaw na chye lu ai re.
N dai laman Myen Hpyen dap ni Putao ginra hta hpyen shamu shamawt ai lam ni ding yang galaw nga ai hpe, KIA KPF pawng hpawm dap maga na, hkap shingla gasat wa ai lam the seng na ginra masha wa n dai zawn tsun dan wa ai re.
“Hkawnglanphu de Majan grai sum wa ai re nga yang, Putao de mung shang wa na hkrit ai ga rai nga ai, Hkawnglanphu lam hku na Machyangbaw Putao lam de shang wa na hpe tsang ai majaw, ndai laman Hpyen shamu shamawt ai lam grai galaw ai majaw, gasat hkrum wa ai ga rai nga ai,” nga tsun dan wa ai re.
Lai was ai bat 5 ya shani hta mung, Tang Ja hte Lung Sha Yang mare lapran na Ndawng Bum na Myen Hpyen dap shara langai hpe Pawng hpawm dap ni htim gasat zing la lu wa ai re.
Dai hpang, Machyang baw Myen hpyen dap ni pru wa ai myen hpyen hpung ni hpe, pawng hpawm dap maga mali hka kau kaw hkap shingla gasat ai hta, sum machyi law wa ai mung rai nga ai.
Ndai laman KIA KPF pawng hpawm dap ni Putao Hkyen Bum ginra ni de hpyen shamu shamawt ai lam ding yang galaw nga nna, Myen Hpyen dap Pyithutsit ni a dap shara n kau hpe gasat zing la lu ai lam ni mung nga taw ai re.
Myen Hpyen dap maga na mung, Y12 nbungli hte bawm sa jahkrat bun taw ai zawn, Holicopter hte Hpyen n gun, laknak arung arai htaw lahka sa ya ai lam ding yang galaw nga ai hpe chye lu ai re.
