Lashio Makau Grupyin na Kokang MNDAA ni hpe yen na Matu Myen Hpyen dap tsun wa
Lashio mare Shinggan kaw dap jung Shara jahkrat da ai Kokang MNDAA dap ni hpe Myen hpyen dap ni yen ya na matu tsun shadut wa ai majaw, Kokang dap maga na n hkap la ya ai majaw, Hpyen masa shaja hkat taw ai lam ginra masha ni tsun ai re.
Lashio mare kaba hta Hpyen masa shaja hkat wa ai majaw, Thipaw Mahkrai hpe laknak lang wuhpung lahkawng maga dap na pat kau wa ai lam chye lu ai.
November 11 ya shani Lashio Muklum Two Elephent Hotel kaw, Myen Hpyen dap Sinpraw Dingdung Taimu hte Kokang MNDAA dap ni n htoi 5 ya hkrum jahta wa ai ten hpyi shawn wa ai lam rai nga ai.
Ndai hkrum jahta bawngban hpawng hta Lashio Muklum shinggan Hoya, Nan Pau mare grup yin na Kokang dap shara ni hpe yen ya na matu Myen hpyen dap maga hpyi shawn wa ai hpe Kokang dap maga n hkap la ai majaw, HPyen masa shaja hkat taw ai lam ginra masha langai KNG de n dai zawn tsun dan wa ai re.
“ Ndai laman Two Elephent Hotel kaw n htoi 5 ya hkrum jahta wa ma ai da, Lashio mare shinggan kaw nga ai Kokang Miwa ni hpe nan the shara de wa mat mu ngu gau ai da, Kokang maga na mung n hkap la lu ai majaw rai sam ma ai, n htoi 5 ya ting hpawng kau ma ai,” nga tsun dan ai re.
Ndai laman Myen Hpyen dap hte Kokang MNDAA dap ni jahkring hkring hkrum jahta bawngban ai rai tim, Mahtai kaja n lu hpyen masa grau grau shaja hkat wa ai lam mung rai nga ai.
Lashio mare kaba hpe Kokang MNDAA dap ni 2024 ning August Shata praw hta gasat zing madu kau wa ai rai nga ai.
Lashio mare kaba hpe Kokang dap htim gasat zing kau ai hpang, Miwa Asuya lapran salang tai ya ai hte Lashio hpe Myen hpyen dap de bai jaw na matu tsun shadut hkrum wa ai re.
Lashio hpe Myen lata de bai jaw na lam hte seng na hkrum jahta wa ai ten, Myen Hpyen dap ni gaw Myo kata shang shara la nna, Myo shinggan mare kahtawng ni hkan gaw, Kokang dap matut nga na lam hpe myit hkrum wa ai rai nga ai.
Dai zawn Myit hkrum da ai lam hpe, n dai laman Myen hpyen dap maga na yen ya na matu bai dip n gun jaw wa ai lam mung rai nga ai.
Ya ten Lashio Myo Shinggan ni hta Myen Hpyen dap the Kokang MNDAA dap ni ni ni htep htep nga nna hpyen masa shaja hkat taw ai lam mung rai nga ai.
