Putao Lungsha Yang hte Tang Ja Mare makau na Ndawng Bum kaw Myen Hpyen hpung ni hpe KIA dap maga hkap shingla gasat ai hta, Myen Hpyen dap maga sum machyi law wa nna, Padang arung arai ni hpe mung zing madu la lu wa ai lam shawng lam hpyen magam gun hte ni nawn ai ni kaw na chye lu ai.
Putao maga de na Myen Hpyen hpung ni yu wa ai hpe November 13 ya shani Ndawng Bum pawt hta hkap shingla gasat ai kaw Myen Hpyen dap maga na si hkala law wa nna, Laknak arung arai law law padang dip zing la lu ai nga, shawng lam hpyen magam gun hte ni nawn ai Salang langai KNG de n dai zawn tsun dan wa ai re.
“Mani Ndawng Bum pawt kaw shakri hkat ai hta, Myen ni ram ram nyam mat sam ai, laknak arung arai ni yawng kabai kau da na she hprawng mat ai nga,” nga tsun dan ai re.
Ndai laman Hkyen bum pawt de na Pyithutsit dap shara law law hpe KIA KPF dap ni gasat zing madu wa ai majaw, Putao ginra de mung majan bai byin wa na hpe myit tsang ai Myen hpyen dap gaw, hpyen shamu shamawt ai lam ni ding yang galaw taw nga ai mung rai nga ai.
Ndai laman Putao ginra de Myen Hpyen dap hte Danggu Dang Pyithutsit hpung ni mung shawa ni hpe Porter rim lahkawn la nna, Shing Hkawng maga de laknak machyu pala lusha ni sa gun sa shangun ai lam ni galaw taw ai lam Putao ginra masha ni kaw na chye lu ai.
Ndai laman Hkyen Bum Shing Hkawng maga de KIA KPF ni htim gasat taw nga ai hta ram ram masan sa Awng Dang ai lam ni lu la taw nga ai lam, shawng lam hpyen magam gun hte ni nawn ai ni tsun ai re.
Ya ten, Jinghpaw Mung jahtum Hkyen Bum maga de KIA KPF dap ni htim gasat taw nga ai hta masan sa awng dang ai lam ni lu la taw ai majaw gaw, Shing Hkawng hte Naw Mung lapran na ginra ni hpe gaw, n dai Shata laman hta up madu lu mat wa na masa nga ai lam matut tsun maram da ai re.
Dai ginra ni de Myen hpyen dap maga na mung Holicopter nbungli the shani shagu ngu na ram Putao Shing Hkawng, Hkawnglan hpu ginra ni de pyen gahkrang taw ai lam chye lu ai re.
