Hpakant ginra kata lani mi laman masha marai 2 hpe gap sat da ai mu ai lam ginra masha ni tsun ai re.
November praw 5 ya shana hkying 10 aten daram hta Seng Tawng Yuma mare maga de sinat laknak kaba ngoi ai n sen na ai hpang, mung shawa marai langai si taw ai hpe mu ai lam ginra masha ni KNG shiga de tsun dan wa ai re.
“Mung Shawa marai lahkawng lam kaba n tsa kaw nan si taw ai, maram yu yang laknak kaba hkyep hkra na si ai re ngu gaw lu maram ai, n dai laman grai wa majan byin ai lam gaw n nga ai. Myen ni laknak kaba gap shadam bun dat ai wa hkra ang mat ai ga rai nga ai,” nga tsun dan ai re.
Dai Si taw ai marai 2 gaw, dai ni du hkra gara kaw na gadai re n chye lu ai nga ginra masha nit sun ai re.
Lai wa sai bat 3 ya shana Hpakant Tatma kawng de KIA maga Shork Taik Done sa gap bun ai hpang, Myen hpyen dap ni makau grup yin ni de laknak kaba gap shapyen bun wa ai lam ni nga ai re.
Myen hpyen dap gap shapyen bun ai laknak kaba ni gaw, Seng Tawng lawk masum maga the Yuma mare ni de wa hkrat kapaw ai lam sagawn chye lu ai.
Mung shawa marai lahkawng si taw ai shara gaw, Myen hpyen dap gap ai laknak kaba si wa hkrat ai grup yin re majaw, laknak kaba si hte si ai masa re lam ginra masha ni tsun maram da ai re.
