Mungmyit Sinli Dingda Ginwang Ginjaw kata na Namhpakka, Mung Yu ginra ni hta Nshung Marang laja lana htu ai majaw, dan da ai mam ni yawng tu yet ma nna, ginra masha ni yak hkak hkrum taw ai lam tsun ai re.
Dai ginra hta lai wa sai October Shata kaw na dan bum da sai hkauna mam ni hte dan da ai Hkauling mam ni hka kaba na yawng mat ai lam ni byin hkrum wa ai lam ginra amyu shayi langai KNG shiga de n dai zawn tsun dan wa ai re.
“ndai zawn n byin ga ai na sai, lai wa 10 jan ning hta mung kalang gaw byin yu ai, tai tim dai ning na ram n sawng ai, dai ning gaw sawng dik re ga rai nga ai. Marang mung shani shana n zim hkra nan htu ai gaw, dai majaw anhte Namhpakka Mung Yu dai grup yin na hkauna mam n kau tu yet ma, yawng lawm ma rai hten za hkrum ai ga rai nga ai. Dai ning gaw sum sai ga rai nga ai.” Nga tsun dan wa ai re.
November praw 1 ya shani kaw na htu hpang wa ai marang kaw bat mi tup n sim n sa htu ai majaw, Bum Hka kaba wa nna, Hkauna mam ni sum hten ma ai rai nga ai.
Namhpakka mare na gaw, n ta htinggaw 6 na hkauna sum machyi hkrum ai rai nna, Mung Yu Dima mare ni hta sawng dik byin wa ai re lam mung chye lu ai.
Nkau gaw, n lu n lawm re, hkoi shap nna sha, hkauna hkai, dan, galaw shangut da lu tim, hkau na atsawm n lu zing shi ai ten, ya na zawn, sum machyi kaba hkrum nna, malu masha a matu myit tsang hpa byin hkrum nga ai lam tsun ai re.
Dai majaw, dai ginra ni hta lit nga ai asuya hte wuhpung wuhpawng ni hku nna, ya na zawn, shingra hpyen a majaw, sum machyi nga ai ginra masha nta htinggaw ni hpe malu masha a matu garum ntum jaw ya na matu hpyi shawn nga ai re.
Ya ten, Namhpakka hta n gu buri mi sen mi jan ram manu nga ai lam chye lu ai re.
Mungmyit Sinli, Kuthkai mare kaba hpe Balawng rawt malan TNLA ni up hkang tawn nna, Namhpaka hpe gaw, Wunpawng Mundan shanglawt hpyendap KIA up hkang tawn ai re.
