Dai hpawt Manap kaw na Manmaw Myen Hpyen dap Hk.L.Y (47) dap makau na shara ni hpe Pawng hpawm dap maga htim gasat taw ai majaw, majan laja lana gap gasat hkat taw nga ai lam shawng lam hpyen magam gun ni tsun dan ai kaw na chye lu ai re.
Pawng hpawm dap maga Manmaw hpe htim gasat ai hta, laga dap shara law law hpe gasat zing la lu wa ai rai tim, Hk.L.Y (47) hte Ts.K.Hk (21) hpe gaw dai ni du hkra n lu zing shi ai mung rai nga ai.
Manmaw 47 dap gap gasat hkat taw nga ai lam the seng nna, shawng lam hpyen magam gun langai KNG Shiga de n dai zawn tsun dan wa ai re.
“Ndai laman Myen ni Nmawk lam Deng 3 maga de nau htu wa ai majaw, anhte maga na ni, Manje lam maga na 47 de bai htim gasat taw ai ga rai nga ai, Myen ni Hpyen n gun grai law mat na, Mawdaw lam makau hkan du hkra bai kahtep wa ai majaw, anhte maga na ni dap kata de shang mat hkra bai hkrau bang taw ai masa mung rai nga ai,” nga tsun dan wa ai re.
September 29 ya shani hta Manmaw Hk.L.Y 47 dap na shawng lam dap shara langai hpe gasat zing kau lu wa ai hpang, shani shagu hpyen masa shaja gasat hkat nga ai kaw na, dai hpawt kaw na gaw dai dap shara hpe htim gasat taw nga ai lam mung rai nga ai.
Ndai laman Myen hpyen dap hte shani shagu htim gasat hkat taw ai shara ni gaw, Manmaw Dakkasu jawng, Namhpa, Ta Mai Lung, maga de ding yang gap gasat hkat taw nga ai kaw na, Nmawk lam Deng 3 maga de mung bai htu wa ai majaw, Majan ding yang byin taw ai rai nga ai.
Ya ten Manmaw htim gasat majan laja lana gap gasat hkat taw nga ai ten, Myen hpyen dap maga na Nbungli Drone hpan hkum ni hte ninghkap shingla gasat taw nga ai re lam chye lu ai.
Myen hpyen dap maga na lai was ai August Shata kaw, Hka Sanghpawli hte hpyen laknak arung arai sha n ga, masha n gun ni mung wa lu sa kau da ai majaw, Manmaw hpe Myen hpyen dap maga ya ten du hkra a tsawm lu ninghkap gasat taw ai mung rai nga ai.
Manmaw hpe lai wa sai 2024 December praw 4 ya jahpawt kaw na KIA the Pawng hpawm dap ni htim gasat hpang wa ai gaw, ya Shata 11 jan na wa sai mung rai nga ai.
