Putao de lung ai Mawdaw ni hpe Tsi mawan Plastic Muga hte Sau N-gu n htaw shalai shangun
Myitkyina Putao lam hpe Myen hpyen dap bai hpaw dat ya ai rai tim, Tsai mawan hte Muga sau n gu ni hpe n htaw shalai shangun taw ai lam, Mawdaw la ni kaw na chye lu ai.
October 23 ya shani Lamung Zup mare kaw Myen hpyen dap lam pat kau ya ai hpang, October 31 ya jahpawt bai hpaw dat ya ai rai nga ai.
Yu wa ai mawdaw ni hpe ding yang shalai ya taw ai rai tim, Lung wa ai mawdaw ni hpe gaw Myen ni shalai ai ten sha mai lai ai masa lam the seng na n dai zawn tsun dan wa ai re.
“hpaw gaw hpaw ya ma ai, rai tim tsi mawan Muga Sau n gu ni n mai htaw ai nga tsun ai. Ya n dai laman gaw, yu wa ai ni hpe gaw a tsawm sha shalai ai rai tim, lung wa ai n kau ni hpe gaw grai jep ai, jep na tan tsi da shangun na shan the lai shangun ai ten laman hta sha mai lai ai,” nga tsun dan ai re.
Lungwa ai mawdaw ni hpe Tsi mawan lawm n lawm sawk jep ai sha n ga, Sau N Gu ni lawm yang mung, dai Sau n gu a matu gumhpraw laksan bai jaw ra ai lam ni nga taw ai re.
Mali Hka Hku Ja Maw ginra ni de lung ai Mawdaw ni hpe ladu lai gumhpraw hkap hta taw ai majaw, Ja htu lauban ni yak hkak taw ai nga tsun ai re.
Ya ten Putao ginra de hpyen masa shaja hkat taw ai sha n ga, Myen hpyen dap maga na mung Sumprabum zawn re de htim gasat wa na masa nga ai lam hpyen masa yu maram ai ni tsun tawn ai re.
Myen Hpyen dap maga na dai zawn lam pat kau ya ai majaw, Putao ginra de gunrai manu nit saw rawt taw nga ai sha n ga, tsi mawan nkau dum hprut taw na, mung shawa ni yak hkak hkrum taw nga ai re.
