Manmaw ginra de shani shagu majan matut n di gasat hkat taw nga ai nga, shawng lam hpyen magam gun ni tsun ai re.
Ndai laman Manmaw gasat majan hta Myen hpyen ni htim dat, Pawng hpawm ni htim dat rai shani shagu laknak kaji kaba ding yang gap hkat taw ai nga shawng lam Hpyen magam gun langai KNG shiga dap de tsun dan wa ai re.
“Laknak kaba n ngoi ai lani mi mung n nga, shani shagu nut hkat taw nga ai, shan hte htim dat, anhte maga na bai htim dat rai shani shagu gap hkat taw ai. Manmaw majan masa gaw gara hku re kun pyi n chye wa sai. Shan hte htim dat, anhte maga na bai htim dat rai,” nga tsun dan ai re.
Lai wa sai lahkawng masum ya gaw, Myen hpyen dap maga KIA ni shara la da ai Hk.L.Y 47 dap shara maga hte Mali hka kau ni de htim gasat wa taw ai majaw, shani shagu laja lana gap gasat hkat taw nga ai mung rai nga ai.
Ndai laman hta mung Myen hpyen maga na, KIA ni shara la da ai Deng 3 maga de bai shadut htim gasat taw ai lam chye lu ai.
Manmaw hpe December praw 4 ya jahpawt kaw na htim gasat hpang wa ai gaw, dai ni ten du hkra laja lana htim gasat taw nga ai n htoi Shata 11 hpring sai re.
Lai wa sai Shata 7 ram du hkra Myen hpyen dap maga sum machyi lam ni tsawm ra law taw ai rai tim, August Shata kawn Myen hpyendap ni Hka Sanghpaw kaba hte laknak machyu pala masha n gun bai lu shadu la ai hpang kaw na gaw, laja lana bai htim gasat wa ai majaw, pawng hpawm dap maga zing da sai shara n kau hpe bai yen ya ra mat ai rai nga ai.
Pawng hpawm dap maga na zing da ai shara n kau hpe Hpyen masa hku gan yen da ya ai sha rai nna, matut htim gasat taw nga ding yang re lam chye lu ai.
Manmaw htim gasat majan hpe jahkring ya na matu, Miwa maga dip n gun jaw taw nga ai rai tim, KIA maga Miwa a ga madat ai lam n nga, gasat nga ding yang re lam, hpyen masa yu maram ai ni tsun da ai re.
