Namhpakka Muklum kaw, laknak ngam hkraw kapaw la ai majaw, magam gun langai the mung shawa langai kapaw si hkrum wa ai lam ginra masha ni kaw na chye lu ai.
November praw langai bat manga ya shana de, Padang kawng kaw na mu hta wa ai 60 mm Mortor si kaw na bawm yam shaw la na matu hkraw kajam ai kaw na kapaw la hkrum wa ai nga ginra masha langai KNG shiga dap de tsun dan wa ai re.
“Namhpakka padang kawng kaw na, Majan ten laman n kapaw na ngam taw 60 mm Motor si langai hta wa ma ai, dai hpe ngam bawm kapaw sha ai kaw lang na matu bawm yam shaw la na nga di hkraw ai kaw na kapaw la ai rai nga ai,” nga tsun dan wa ai re.
Dai Motor si gaw, Namhpakka Majan ten laman Myen hpyen dap ni gap na n kapaw ai ngam taw ai Motor si re lam mung, ginra masha ni kaw na matut chye lu ai re.
Ya si hkrum ai yan lahkawng gaw, Namhpakka Manau Yang mare na Salang Labya Brang Awng ngu ai wa the MHH magam gun Salang Jangmaw Yaw Shu ngu ai yan re lam chye lu ai.
Namhpakka Mare hta dai zawn laknak hkraw ai kaw na kapaw si hkrum ai mabyin ndai kalang hte rai yang, lahkawng lang byin wa sai mung rai nga ai.
Namhpakka muklum gaw Dingda ginwang ginjaw hte ni dik ginra langai mung re ai zawn, KIO Uphkang ginra langai mung rai nga ai.
