Hpakant Tatma Mu galai ai hte KIA Maga 107mm Short Taik Dung Sa Gap Bun Wa
Hpakant Tatma Mu galai ai n htoi lahkawng ya sha naw re ai hte KIA maga na Short Taik Dung sa gap bun wa ai lam, KIA hte ni nawn ai ginra masha ni kaw na chye lu ai.
Lai wa sai October 29 bat 3 ya shani Hpakant Tatma mu galai ai hpang, October 31 bat 5 ya shana KIA maga 107 mm Short Taik Dung sa gap bun wa ai majaw, Myen hpyen dap maga na mung makau grup yin ni de laknak kaba bai gap shadam bun wa ai nga, buga ginra masha langai KNG shiga dap de tsun dan wa ai re.
“Ndai laman sha Tatma Mu nnan bai galai ai nga na, dai majaw she n rai i? anhte maga na ni shawng Tatma kawng hpe 107 mm Short Taik Dung sa gap bun ma ai da, dai hpang kaw na gaw Myen ni maga de na , Tatma kawng, Rahkaing kawng, Mashi Kahtawng သီလရှင်ကုန်း ni hkan na laknak kaba agying bai gap sharu bun wa ai ga rai nga ai.”nga tsun dan wa ai re.
Hpakant tatma kawng hpe KIA maga laknak kaba sa gap bun ai hpang, Myen Hpyen dap maga na mung, Tatma kawng, Rahkaing kawng, Mashi Kahtawng သီလရှင်ကုန်း hkan na Yuma maga de laknak kaji kaba bai gap shadam bun wa ai majaw, Seng Tawng mare lawk masum maga de wa hkrat kapaw ai re hpe chye lu ai.
Hpakant tatma mu ဗိုလ်မှူးကြီး ဇော်ဝင်း ngu ai wa na shara hta Tatma Mu nnan, ဗိုလ်မှူးချူပ် ကျော်ထင်ငြိမ်း ngu ai wa bai wa du galai ai lam sagawn chye lu ai.
Lai wa sai May Shata hta gaw, ဗိုလ်မှူးချူပ် ကျော်ဆက်မြင့် kaw na ဗိုလ်မှူးကြီး ဇော်ဝင်း wa galai la ai rai nna, ဗိုလ်မှူးကြီး ဇော်ဝင်း dung ai ya Shata kru sha naw rai yang, kalang bai galai kachyai galaw wa ai mung rai nga ai.
Hpakant ginra de dai ning April Shata kaw na Myen hpyen dap Tatma mu galai na gabaw hte htu shadut shang wa ai kaw na, hpyen majan byin taw nga ai gaw dai ni ten du hkra rai nga ai re.
Ya na zawn Seng Tawng mare de laknak kaba bai wa hkrat kapaw wa ai majaw, ginra masha n kau hkrit kajawng hprawng yen ai ni mung nga wa ai hpe matut chye lu ai re.
