Putao Mali Hkahku de lung ai Mawdaw yawng hpe dai hpawt manap kaw na Lamung Zup mare na Myen hpyen dap shagyit kaw n shalai mat sai nga Mawdaw la ni tsun ai re.
“Tayang Zup de gunrai wa sa na matu dai hpawt lung wa ai, lam pat sai nga na Lamung Zup Myen hpyen dap shagyit kaw na n lai shangun mat ma ai, bai n htang yu wa ai, nkau gaw lam makau shingnip hkan naw la taw ma ai, mi bai hpaw ya kun ngu hku rai nga ai. Galoi du hkra pat na hpe mung n tsun ma ai.” Nga na tsun dan ai re.
Myen Hpyen dap ni Lamung Zup mare kaw pat da ai rai nna, galoi gara ten du hkra pat na ngu ai lam hpe mung atsawm tup hkrak n tsun ai majaw, hkrun lam hkawm mung shawa ni hte Mawdaw la ni yak hkak hkrum taw ai lam matut chye lu ai.
Myen Hpyen dap ni kaw na Lamung Zup kaw n lai shangun ai majaw, Putao lam de lung ai mawdaw ni yawng, Nawng Nang, Shwezet lam kaba mayan ding gren tsap jawng taw nga ai lam matut chye lu ai.
Mali Hka Hku Ja Maw ginra de htaw shalai na gunrai ni yawng hpe mung, Tiyang Zup mare du hkra Mawdaw the htaw sa ai re majaw gaw, Mali Hku Ja Maw de htaw sa ai gunrai n kau hten mat na hpe myit tsang ai lam ni mung nga taw ai lam, Mali hku Ja maw de nga ai mung shawa langai mung KNG de n dai zawn tsun ai re.
“Anhte gaw Maw de sa na matu yet wa ai baw gunrai ni mung lawm ai le, Mawdaw kaw yawn bawn da na lung wa ai rai nga ai, lam kaw n hkap shalai rai jang gaw dai rai ni yet ma sana rai nga ai,” nga tsun dan ai re.
Ndai laman Myitkyina Putao lam lapran hta gap gasat hkat ai lam n nga tim, Machyang Baw, Hkawng Lan Phu ginra hkan na Myen Hpyen dap shara n kau tat sum wa taw nga ai majaw, Myen Hpyen dap maga na n dai zawn lam pat ai masa re nga ginra masha nkau tsun maram taw nga ai re.
