Hpakant Lawng Hkang, Lung Seng Gat hta Mana hkying 7 aten daram Sinat gap kapaw jahkrit ai lam galaw wa ai majaw, masha yawng hprawng bra ai lam byin wa ai lam ginra mash ani kaw na chye lu ai.
Mana hkying 7 aten daram hta Hpakant maga de na Crown Mawdaw achyang hte yu wa ai masha marai 3 daram gaw, Lung Seng gat kaw sinat gap kapaw jahkrit wa ai re lam ginra masha langai KNG de n dai zawn tsun dan wa ai re.
“Mana Hkying 7 ram kaw re Masha loi sha naw law wa ai ten, Hpakant maga de yu wa ai Crown Mawdaw achyang kaw na masha marai 3 pru wa na sinat gap kapaw dat ai majaw yawng hprawng bra ayai mat ai ga rai nga ai, gadai gara maga na ngu tsun na mung yak ai law,” nga tsun dan wa ai re.
Mana Lawng Hkang Lung Seng Wai kaw sinat gap kapaw jahkrit ai masa hpe yu yang, laknak lang wuhpung lahkawng maga na, Masha mahkawng ai hpe n ra ai masa lam re nga, ginra masha ni tsun maram da ai re.
Dai hpang Mana Hkying 8 hte hkying 9 aten lapran hta sha, KIA Dung 6 ginra de Y12 nbungli the bawm bai wa jahkrat ai lam chye lu ai.
Dai nbungli bawm wa jahkrat ai hta, Ginsi Dung 6 ginra kaw bawm 30 lang jahkrat kau da ai lam ginra masha ni kaw na chye lu ai.
Hpakant KIA Dung 6 ginra de n dai laman Myen hpyen dap Y12 Nbungli the ding yang bawm wa jahkrat ai n htoi 2 ya rai sai lam chye lu ai.
October 21 ya jahpawt hkying 8 aten daram hta mung Y12 kaw na nbungli bawm 36 lang wa jahkrat bun kau da ai hpang, Mana kalang bai wa jahkrat bun wa ai mung rai nga ai.
