Hkawnglanphu Ginra na Myen Hpyen Dap shara lahkawng Hpe KIA Bai Gasat Zing La Lu
Wunpawng Mungdan Shanglawt Hpyendap KIA Woi awn ai hte KIA KPF PDF Pawng hpawm dap ni Hkawng Lan Phu ginra Shilamdam the Mahkungdam ginra na Hk.L.Y 137 hte Pyithutsit pawng hpawm n inga ai dap shara lahkawng hpe bai gasat zing la lu wa ai nga shawng lam hpyen magam gun ni kaw na chye lu ai re.
Dai shara gaw, Jinghpaw Mung Dingdung Jahtum Hkyen bum marawn rai nga ai, Shilamdam the Mahkungdam mare kaw dap jung shara jahkrat dai Hk.L.Y 137 the Pyithutsit Hpyen n gun 100 grup yin ram nga ai dap shara hpe October 21 ya shani gasat zing la lu wa ai re.
“Mani Shawng Shani October 21 ya shani gasat zing la lu ai rai nga ai, Dai shara gaw Shilamdam the Mahkungdam ngu ai rai nna moi ya Myen ni htim gasat wa ai Lahe Sin Dap shawng Meter 3000 the 4000 ram tsan ai shara kaw na dap shara rai nga ai,” nga tsun dan ai re.
Hkawng Lan Phu ginra na Myen Hpyen Pyithutsit dap ni hpe sa htim gasat taw nga ai majaw, Myen Hpyen dap maga na n dai laman Langse Ginra de Nbungli bawm shani shagu wa jahkrat bun taw nga ai mung rai nga ai.
Langse Ginra de nbungli bawm wa jahkrat bun ai hta, Mani October 22 ya shani hkying 12 aten daram hta mung, Langse mare hte deng mi daram sha tsan ai Ja Maw ginra ni hta, Y12 nbungli bawm 20 lang jan jahkrat bun kau da ai re.
Ndai laman Langse Ginra de nbungli shani shagu wa jahkrat bun taw ai mani hte rai yang, n htoi 3 ya rai sai lam chye lu ai.
Ndai laman bai htim gasat zing ai shara gaw, lai wa sai Shata kaw htim gasat zing ai Lahesin dap shara a shawng Meter Hkying masum mali daram tsan ai dap shara kaba langai re lam shawng lam hpyen magam gun ni matut tsun ai re.
