Zahkung Ting Ying woi awn ai NDA-K Pyithutsit Dap na, Pyithutsit Matsun Dukaba Lagwi Bawm Lang gaw, Pang Wa ginra hpe tat sum kau ai hpang, shi hte Matut Mahkai n lu mat ai majaw, Ra ai lam Bawngban jahkrup na matu lang hte lang matut yu ai rai tim, Matut mahkai n lu mat ai majaw, shi hpe NDA-K Wuhpung na shapraw kau sai lam ndau wa ai re.
Dai ndau laika hta Chihpwi Pang Wa ginra hpe KIA woi awn ai Dap hpawm ni htim gasat zing madu kau ai hpang ngam nga ai magam gun n kau tinang ginra hpe bai makawp maga sa wa lu na matu  Salang Lagwi Bawm Lang hpe lang hte lang matut mahkai lai wa yu sai rai nna, March Shata praw 6 ya shani hta shi the ading tawt hkrum jahta bawng ban ai hpang, shi hpe March 20 ya shani hpang jahtum tawn nna dap de bai du wa na matu tsun da ai rai tim,  shi maga hku na n htang wa ai lam n nga sai re majaw gaw, shi hpe ap da ai amu bungli ni yawng hpe dawm jahkring kau sai lam tsun da ai re.
Salang Lagwi Bawm Lang hpe Zahkung Ting Ying Wuhpung kaw na jahkring shapraw kau sai re majaw, shi the seng ai amu hpaga lam ni yawng, NDA-K Wuhpung hte n seng sai lam tsun tawn ai re.
Dukaba Lagwi Bawm Lang gaw, NDA-K dap kata shaning 20 ning daram magam gun lai wa nna, Pyithutsit galai mat ai hpang, Pyithutsit Matsun dukaba litla wa ai wa mung rai nga ai.
Zahkung Ting Ying Wuhpung ni kaw na ya na zawn n dau laika shapraw wa ai hpe yu yang, Chihpwi Pang Wa ginra hpe KIA htim gasat ai ten, Majan grai wa laja lana n byin ai hpe yu yang, Bawm Lang wa hte jahkrup bawng ban da na masa nga ai lam, Mung masa yu maram ai ni tsun da ai re.
