Waimaw Lamyang mare hpe Myen Hpyen dap hte Pyithutsit hpyen n gun kaba hte mani mana tup laja lana sa htim gap gasat nga ai majaw, Majan laja lana byin taw ai lam, shawng lam magam gun the ni nawn ai ni tsun dan ai re.
Waimaw Lamyang mare maga de Myen Hpyen dap ni October praw 5 ya shana Nbungli laknak kaba laja lana sa gap sharu bun kau da ai hpang, October praw 6 ya, Mani hpawt kaw na lagaw lam the htu lung wa ai ai majaw, gasat poi laja lana byin wa ai lam chye lu ai.
Lagaw dap hte htu lung wa ai Hpyen hpung ni hpe, KIA maga hkap shingla gasat ai hta, sum machyi law ai majaw, bai n htang hting nut yu mat ai lam chye lu ai.
Myen Hpyen dap maga na gaw, mana tup mung Myitkyina Waimaw hkan na laknak kaba ni gap shapyen bun ai sha n ga, dai hpawt manap du hkra n bungli the bawm wa jahkrat bun ai nga, Waimaw ginra masha langai KNG shiga de tsun dan ai re.
Waimaw Lamyang lam hpe htim gasat taw nga ai, ya Shata masum mali na wa ai rai tim, n lu htim gasat waw hkraw ai majaw, Myitkyina Myen Hpyen dap daju M.P.Hk kaw na gaw, Lamyang hku n lu htu gasat baw jang, Nawng Hkying, Gwi Htu, Lawa Yang lam hku na htim gasat waw na matu bai matsun da ai lam ni nga ai nga, Pyothutsit the ni nawn ai ni KNG de n dai zawn tsun dan wa ai re.
“ Ya Shiga langai bai pru taw nga ai, Lamyang maga hku na n lu htu waw jang, Nawng Hkying, Gwi Htu, Lawa yang maga hku bai gasat na matu M.P.Hk na matsun ai nga shiga na taw ai, Lama Gwi Htu maga de Majan byin wa ai rai yang, ya hprawng yen taw ai Hpyen yen ni yawng kalang bai yen ra sai,” nga tsun dan wa ai re.
Lama Myen ni Nawng Hkying Gwi Htu lam hku na bai htu lung wa ai rai yang, Waimaw ginra masha ni hpyen yen nga ai shara kaw na, kalang bai htawt sit hprawng yen ra na masa nga ai majaw, Hpyen yen mung shawa ni Myitru myittsang byin nga ai lam, Hpyen yen Sara langai mung KNG de tsun ai re.
Myen Hpyen dap maga na gaw, dai hpawt du hkra, Lamyang mare kaw nbungli bawm wa jahkrat bun ai nga ginra masha ni tsun ai re.
