Putao kaw Pyithutsit woi awn na KIA PDF hpe n ra sharawng ai lam n-gun madun poi lamang galaw
Putao Mare kaba hta dai hpawt manap KIA PDF hpe ning hkap ai n gun madun poi lamang langai hpe Pyithutsit ni woi awn galaw wa ai lam chye lu ai.
Ndai n gun madun poi lamang hpe Pyithutsit hte Ralata poi shang shingjawng hkyen nga ai USDP Party hpung shang salang n kau ni woi awn ai hte galaw wa ai rai nna, n ta langai na langai n sa n mai saw shaga na woi galaw wa ai lam, Putao ginra masha langai KNG de n dai zawn tsun dan wa ai re.
“Myen Hpyen dap hpe madi shadaw ai masha n kau woi galaw ai rai nga ai, N ta langai na langai n sa n mai atik anang hkan shaga na woi galaw wa ai re. Madung shan the gaw ralata poi hpe a tsawm sha lu galaw hkra ngu gabaw shaw na woi galaw wa ai ga rai nga ai,” nga tsun dan wa ai re.
Dai n gun madun poi lamang hta shanglawm ai ni gaw Langse ginra de shang wa ai KIA PDF ni hpe nra ai lam jahtau nsen hte rau, KIA hpe ninghkap ai pyendau ni hpe lang let n gun madun wa ai re.
Lai wa sai October praw 4 ya shani hta mung, Hkawng Lan Phu Mare hta Pyithutsit ni woi awn na n gun madun poi lamang galaw wa ai re.
Ya ten Hkawng Lan Phu Ginwang kata Myen Hpyen dap hte Pyithutsit ni pawng nna, KIA KPF ni nga ai shara de htim gasat taw nga ai lam hta, Myen Hpyen dap Pyithutsit maga sum machyi lam ni law taw nga ai re.
Myen HPyen dap maga Lang Se hpe bai lu hkra htim gasat yu wa na matu shakut yu ai rai tim, Lahe Sin dap shara kaw sum machyi law mat ai majaw, ya du hkra n lu gasat yu wa na, Mung shawa ni hpe ya na zawn n gun madun shangun wa ai lam re nga nna, Hpyen masa yu maram ai ni tsun tawn ai re.
