Jinghpaw Mung hte Sagaing Jarit lapran na Bamauk Muklum hpe Sam Hkyeng SNA dap ni lai was ai 5 ya ram kaw na bai n htang htim gasat taw ai lam, shawng lam hpyen magam gun ni tsun ai re.
Bamauk Muklum hpe PDF pawng hpawm dap maga September 20 ya shani htim gasat zing madu da lu wa ai rai nga ai.
Ya na zawn KIA PDF pawng hpawm dap ni gasat zing da ai Bamauk muklum hpe Myen Hpyen dap hte SNA dap ni pawng nna October praw 4 ya shani kaw na bai htim gasat wa ai lam chye lu ai.
Ya htim gasat wa ai ni gaw, Hummalin kaw dap jung shara jahkrat nga ai Myen Hpyen dap dapnu 33 n pu na Myen Hpyen hpung ni hte SNA dap ni pawng nna, Bamauk hpe bai htim gasat taw nga ai lam, PDF lit nga ai salang langai KNG de n dai zawn tsun dan wa ai re.
“Lai wa sai 4,5 ya ram kaw na sinat nsen nig rai bai na wa ai, Majan bai laja wa ai ga rai nga ai, madung gaw Hummalin maga de na Myen Hpyen dap the SNA ni pawng nna, Bamauk hpe bai n htang htim gasat ai ga rai nga ai, Myo kata de gaw rai n du shi ai, Ya gaw Myen hte SNA ni pawng na bai htim gasat wa ai majaw, shan hte maga Hpyen n gun grai law ai, lai wa sai ten gaw, SNA ni hkrai sha gasat ai le, ya n dai kalang gaw, Tatma 33 ni ma lawm ai,” nga tsun dan ai re.
Myen Hpyen dap hte SNA dap ni hpyen n gun kaba the bai htim gasat wa ai majaw, Bamauk muklum hpe gasat zing da ai PDF dap ni gaw, ခမိုး mare hte စက်တော mare ni de gan thing nut yen taw nga ai lam chye lu ai.
Bamauk hpe PDF dap maga htim gasat zing kau ngut ai bat mi daram gaw, majan byin ai lam n nga ai rai tim, lai wa sai 4, 5 ya ram kaw na, gasat gala majan ni bai byin taw nga ai rai nna, n dai laman Myen Hpyen dap hte SNA dap maga hpyen n gun kaba the htim gasat taw ai majaw, Pawng hpawm dap maga shara n kau hpe bai gan yen kau da ya ai lam ni nga ai nga ai na dai ginra na magam gun langai KNG de tsun dan wa ai rai nga ai.
Ya ten PDF pawng hpawm dap maga na gaw, Bamauk muklum yawng hpe yen kau ai lam n re sha, Myen ni Bamauk the deng 5 daram sha tsan sai shara du hkra htu gasat wa ai majaw, shara n kau hpe yen da ai lam sha re nga matut tsun dan ai re.
PDF pawng hpawm dap maga na muklum shagrawt majan masing hta Drone the laknak kaba hpe sha lu jai lang ai rai tim, Myen Hpyen dap maga na gaw, nbungli laknak kaba hkum, Madang tsaw Drone ni jai lang wa ai majaw, Pawng hpawm dap maga gan yen da ya ra ai mung rai nga ai.
Bamauk muklum kaw na Sam HKyeng SNA dap ni September 20 ya shana yen mat ai hpang, Pawng hpawm dap ni Bamauk muklum hpe sin up madu taw nga ai mung rai nga ai.
Bamauk muklum kaw na SNA dap ni gaw, Muklum shinggan de thing nut yen mat ai masa sha rai nna, ya kalang masha n gun bai mahkawng la na, Bamauk hpe bai gasat wa ai lam mung rai nga ai.
Ya ten Bamauk ginwang kata na shara law malawng hta Sam Hkyeng SNA ni naw shara la da ai majaw, Bamauk majan matut na laja lana gap gasat hkat wa na masa nga ai lam, hpyen masa yu maram ai ni tsun tawn ai re.
