Manmaw Shawnglam Dap Shara n-kau bai Gasat Zing La Lu na, Majan Matut Byin Nga

Manmaw Majan hta pawng hpawm dap maga na tat sum kau ai shara nkau hpe n dai laman  bai gasat padang dip la na, ahkyak ai shara 3 ram hta majan laja lana matut byin taw ai nga, KIA maga tsun ai re.

September 29 ya shani hpang kaw na bai byin ai majan ten laman Hk.L.Y 47 dap shingdu maga na shawng lam dap shara langai the Manmaw hte Nmawk lapran na Deng 2 Shwe Pyi Thar KBC Nawku Jawng makau grup yin na dap shara lahkawng hpe gasat zing la lu ai nga Dukaba Nhpang Naw Bu KNG shiga de n dai zawn tsun ai re.

Ya hte na bat kaw na bai byin ai Manmaw majan hta Hk.L.Y 47 na ကာကင်း dap shara langai hpe gasat zing lu ai, ngut nna Nmawk lung wa lam, Deng 2 grup yin na ထောက်ပို့ dap hte KBC Nawku Jawng kawng shara ni hpe gasat zing la lu ai lam nga ai, ya hpang jahtum သံချပ်ကာ dap num shang kaw gasat poi byin taw nga ai,” nga tsun dan ai re.

Ya ten ahkyak ai dap shara ni hpe rai n lu gasat zing shi ai rai tim, Hk.L.Y 47 dap hte Deng 2 makau grup yin na ထောက်ပို့ dap makau grup yin hkan majan laja lana matut byin taw nga ai re.

Myen Hpyen dap maga na Hpyen Man 3 hpaw na htim gasat nga ai zawn, nbungli hte mung lani mi yawm dik 3 lang wa gap bun taw nga ai re.

Lai wa sai September laman hta sha Pawng hpawm dap maga na ahkyak ai dap shara n kau hpe tat sum kau nna, Myen hpyen စစ်ကြောင်း shang wa ai hpe pawng hpawm dap maga na hkap wang gasat shagrawt kau lu wa ai lam ni  mung nga ai re.

Manmaw majan gaw, n dai laman hta mung shani shagu majan laja lana gap gasat hkat taw nga ai rai nna, Myo kata sha n ga, shinggan shara ni de mung gap gasat hkat taw ai lam, shawng lam magam gun langai KNG de n dai zawn matut tsun dan wa ai re.

“lahkawng maga dap na hpyen n gun gaw kachyi kachyaw sha n re, grai law ai. Majan byin ai shar ani mung n bung ai. Shara dam ai re nga yang kalang marang nga yang, Myen hpyen la ni gara shara kaw nga taw ai re mung n chye, dai ni n dai kaw byin taw tim, ya hkring rai yang htaw shara mi de bai byin mat was ai. Ndai laman gaw Deng 2 maga hte nbungli pa lam ding yang kaw byin taw ai ga rai nga ai,” nga tsun dan ai re.

Pawng hpawm dap mag ana gasat zing da ai Hk.L.Y 236 hte hpri gang dap 5014 dap shara n kau hpe lai wa sai September Shata hta gan yen htingnut da ai re.

Lai wa sai Shata kaw dap shara n kau hpe tat sum kau da ai hpang, Manau Wang hte Nbungli Pa makau ni hta majan laja taw ai mung rai nga ai.