Lahta Sammung Kyauk Me Muklum hpe Myen hpyen dap ni October praw 1 ya shani bai htim gasat zing madu kau lu sai lam, Myen hpyen shiga lawk ni hta tsun da ai hpe mu lu ai.
Kyauk Me Muklum hpe Myen hpyen dap maga, Nbungli Drone Laknak kaba hpan hku jai lang nna, htim gasat wa ai majaw, Balawng TNLA dap maga na yen ya mat ra ai lam chye lu ai.
Myen Hpyen dap maga na gaw, Nawng Cho hpe htim gasat zing madu kau ngut ai hpang kaw na, Kyauk Me muklum hpe bai htim gasat wa ai mung rai nga ai.
TNLA Dap maga Nawng Cho Muklum hpe July Shata kaw tat sum kau da ai hpang Gok Htik lam n tsa shara ni hta laja lana matut gap gasat hkat wa ai re.
Gok Htik hpe tat sum kau ai hpang, Myen hpyen dap ni Kyauk Me de htim gasat shang wa ai mung rai nga ai.
Kyauk Me hpe Balawng TNLA hte Mandalay PDF pawng hpawm dap ni Shata 2 ram hkap shingla gasat ai rai tim, Myen hpyen dap maga na Laknak n gun kaba hte htim gasat zing madu kau wa ai mung rai nga ai.
Ya ten Myen Hpyen dap ni Kyauk Me muklum kata shang shara la taw nga sai rai nna, Kyauk Me hpe gasat zing ngut jang, Mogok, Thi Paw ni de bai matut htim gasat wa na masa nga ai lam, ginra masha ni tsun maram nga ma ai re.
