Myen Hpyen Dap woi awn galaw na Ra lata poi hpe Zahkung Ting Ying woi awn ai hpung ni Madi shadaw ai hte Hpyen dap hte rau ra lata poi shang shingjawng lawm mat na lam, September 18 ya shani n dau tawn ai re.
Dai n dau laika hta Mye mung a mung masa Hpyen masa lam ni hpe Ra lata poi galaw ai lai ladat hte sha simsa lam hpe lu gaw gap sa wa na re majaw gaw, du na December 28 ya shani galaw na ra lata poi hpe Masat (1) laksan ginra hpung ni kaw na madi shadaw lawm ai the tinang ginra Chihpwi Saw Law, Waimaw ginra ni hta shang shingjawng lawm mat na lam tsun da ai re.
Zahkung Ting Ying Woi awn ai Pyithutsit, BGF dap shara yawng hpe Wunpawng Mungdan Shanglawt Hpyendap KIA woi awn ai hte PDF pawng hpawm dap ni 2024 Nov, Dec, Jan, Feb Shata laman ni hta gasat zing madu kau ma ai rai nga ai.
Ya ten dai ginra yawng hpe KIO Asuya uphkang Sairu hte sa taw nga ai rai nna, laga ra ai lam ni yawng hpe mung KIO maga jahkum shatsup taw nga ding yang re mung chye lu ai.
Pyithutsit hte BGF dap maga na ni mung dai ginra yawng hpe bai gasat zing la lu hkra, Myen HPyen dap the pawng nna, Hpyen wunkat ni sharin jat la nna, hpyen n-gun mahkawng taw nga ai ten mung rai nga ai.
